Talenti i xhudos nga Kosova, Jon Kuka, ka shkëlqyer në garën prestigjioze të Kupës Evropiane për kadetë, e zhvilluar në Kranjska Gora të Sllovenisë, ku arriti të sigurojë medaljen e bronztë në kategorinë deri në 55 kilogramë.
Xhudisti i ri, që vjen nga një familje me traditë të madhe në këtë sport – djali i trajnerit të njohur Driton Kuka – tregoi karakter dhe vendosmëri gjatë gjithë ditës së garave.
Kuka e nisi me dy fitore bindëse ndaj përfaqësuesve të Gjermanisë dhe Austrisë, duke e siguruar kualifikimin në raundet vendimtare. Edhe pse pësoi humbje nga rivali holandez në ndeshjen e tretë, ai nuk u dorëzua.
Nëpërmjet repesazhit, i riu nga Peja arriti një sërë triumfesh të rëndësishme: fillimisht kundër një xhudisti izraelit, më pas ndaj garuesit francez, ndërsa duelin për vendin e tretë e fitoi plot meritë kundër sportistit serb, Lazar Bogdanoviq.
