Pas përpjekjes së dështuar të kryeministrit në detyrë, Albin Kurti, për të arritur një marrëveshje politike me Nismën e Fatmir Limajt, kanë nisur reagimet dhe akuzat nga eksponentë të Vetëvendosjes.
Alban Krasniqi, bashkëshorti i ministres së Drejtësisë Albulena Haxhiu, ka akuzuar publikisht Fatmir Limajn dhe partinë e tij për manipulim dhe vjedhje votash gjatë zgjedhjeve.
Ai ka kërkuar që Prokuroria të nisë hetime për këto pretendime.
“Thënia “Ja kam votu votën” i ka rrënjët nga Nisma dhe sistemi i saj i kushtëzimit dhe shitblerjes së votës përmes asistencës. A ka turp më të madh se sa për një grusht votash ti detyrosh e ti trajtosh vajzat e gratë si analfabete dhe të padenja të votojnë pa mbikëqyrje të burrave dhe rrugaqëve të partisë që shërbejnë si asistues, ti trajtosh rininë si të paaftë e të padijshëm, pensionistët si të verbër?! Po mendojnë që e kanë arritur fitoren, por në fakt e kanë prekur FUNDin”, ka shkruar Krasniqi në Facebook.
Këto përplasje vijnë pas disa javësh përpjekjesh për marrëveshje politike mes Kurtit dhe Limajt. Vetë kryeministri kishte treguar publikisht se i kishte ofruar Nismës një post ministror dhe pozitën e nënkryetarit të Kuvendit, por marrëveshja dështoi.
Pavarësisht gatishmërisë së shprehur më herët nga Vetëvendosje për bashkëqeverisje, Limaj dhe dy deputetët e tij nuk votuan për Qeverinë e re./Insajderi
