Ishte ditë më parë kryeministri në detyrë, Albin Kurti.
E pas tij, tash edhe presidentja Vjosa Osmani.
Të dy po paralajmërojnë se përveç zgjedhjeve të mundshme në dhjetor, zgjedhje mund të ketë edhe në mars.
Kjo pasi do të jetë e vështirë të zgjidhet presidenti, e për të cilin duhen të paktën 80 vota.
“Kjo çështje është ngritur nga disa prej pjesëmarrësve për të paralajmëruar një situatë që mund të përballemi si vend. Ta zëmë ka zgjedhje në dhjetor, pastaj merr disa muaj kohë deri t’i kemi institucionet, dhe pastaj sapo ta kemi një qeveri, menjëherë në mungesë kuorumi prej 2/3 menjëherë vendi shkon në zgjedhje të reja për shkak të dështimit të zgjedhjes së presidentit. Një situatë e tillë u përmend, për të paralajmëruar se mund të kemi dy palë zgjedhje në 3-4 muajt në vijim që është situatë e rëndë jo vetëm për KQZ, por edhe si situatë ku qytetarët për periudhë të gjatë të mos i kenë institucionet”, ka thënë presidentja Vjosa Osmani.
Fjalët e Osmanit janë në linjë me të Kurtit. Edhe ai kishte paralajmëruar njëjtë.
Sipas deklaratave të tij, zgjedhje mund të ketë edhe më dhjetor edhe në mars.
“Nuk kemi marrë ftesë nga presidentja Vjosa Osmani. E dimë se për herën e dytë është në diskrecionin e saj çështja e mandatarit për formimin e qeverisë. Nga ajo që dëgjuam dje, duket se të gjithë po përgatiten për zgjedhje të reja dhe për balotazhin në zgjedhjet lokale”, tha Kurti.
“Mbase është për të ardhur keq — përveç balotazhit, edhe dy herë të tjera zgjedhje. Edhe zgjedhje në dimër edhe zgjedhje në pranverë, sepse kur nuk arritëm t’i bëjmë 61 deputetë për një qeveri të re, atëherë është e pamundur t’i bëjmë 80 deputetë për zgjedhjen e presidentes. Kemi mundur së paku këto zgjedhjet e dhjetorit t’i evitojmë,” tha ai.
Pra, nëse fjalët e Kurtit dhe Osmanit qëndrojnë, qytetarët e Kosovës mund t’i bie të votojnë 5 herë brenda një viti. Zgjedhjet qendrore në shkurt, lokale më 12 tetor, balotazhi i nëntorit, zgjedhjet parlamentare në dhjetor, dhe të tjerat në mars.
Mbetet të shihet nëse në mars mund të ketë koalicion më të madh që ka edhe votat për president, apo qytetarët e Kosovës do të detyrohen t’u drejtohen kutive të votimit për pesë herë brenda një afati prej një viti.
Kjo, edhe për KQZ-në është vlerësuar barrë e rëndë.
