Kompania “Dreni”, që është themeluar nga Flamur Fetahaj, nënkryetar i Gjakovës, ka marrë disa tenderë po në këtë komunë. Këto kontrata kapin shifrën prej afro gjysmë milioni dhe u dhanë kryesisht për transport.
Flamur Fetahaj në faqen zyrtare të komunës figuron si nënkryetar i Komunës që udhëhiqet nga Ardian Gjini.
I njëjti, në të dhënat e tij, ka deklaruar se është themelues dhe menaxher i kompanisë auto-transportuese “Dreni”.
Pikërisht kësaj kompanie të themeluar nga nënkryetari i janë besuar disa tenderë nga Komuna e Gjakovës.
Kontratat që u lidhen nga Komuna me kompaninë “Dreni”
Në platformën e-prokurimit figurojnë disa kontrata të kompanisë “N.P.SH. ” Dreni “, të gjitha këto janë të lidhura me Komunën e Gjakovës, shkruan Insajderi.
Në këtë vit u nënshkruan dy tenderë: një për “Transportin e nxënësve nga Lagjja Ali Ibra në shkolla”, në vlerë prej afro 14 mijë euro, dhe tjetri “Re-tender – Transporti i nxënësve në relacione të ndryshme”.
Ndërsa në vitin 2024, kjo kompani e themeluar nga nënkryetari ka përfituar 115 mijë euro.
Por më së shumti kjo kompani del se ka fituar në vitin 2023, kur mori tenderin “Transporti i nxënësve në relacione të ndryshme”, prej afro 200 mijë euro.
Çka fshihet prapa kompanisë “N.P.SH. Dreni”?
Në vitin 2019, gjatë deklarimit të pasurisë Flamur Fetahaj, deklaroi se është drejtor në kompaninë “N.P.SH. ” Dreni.
Ndërsa në pronësi ka deklaruar edhe 4 autobusë në vlerë prej 35 mijë euro.
Në vitin 2020 ai deklaron se nga kjo kompani merr të ardhura vetëm djali i tij.
Por, në vitin 2021 kur bëhet nënkryetar ndryshon deklarimin.
Kjo kompani figuron në atë deklarim në emër të Gëzim Lulaj.
Sipas LVV-së dega në Gjakovë, Lulaj ishte shofer i tij.
Ndërsa kompania “Dreni“, nga viti 2021 ka u ‘shpërblye’ me afro gjysmë milioni nga Komuna e Gjakovës.
