Partia Demokratike e Kosovës dhe Lidhja Demokratike e Kosovës kanë bërë publike marrëveshjen për të hyrë në koalicion në raundin e dytë të zgjedhjeve lokale në Prizren.
Lajmi u konfirmua nga kryetari aktual i komunës, Shaqir Totaj, i cili përmes një postimi në Facebook njoftoi se dy partitë do të garojnë së bashku në balotazh.
“ Rezultati i rundit të parë të zgjedhjeve tregoi qartë besimin për të vazhduar edhe një mandat me punë të mira e vepra konkrete për Prizrenin. Mbështetja e treguar në çdo lagje, kudo në qytet e fshat, ishte dëshmia e rrugës së drejt që kemi ndjekur duke iu qëndruar afër qytetarëve pa dallim. Absolutisht jemi të vetëdijshëm se ende ka shumë punë bërë të bërë për Prizrenin që e duam të gjithë. Prandaj, në këto zgjedhje kemi shpalosur vizionin e ri të projekteve të mëdha që e modernizojnë Prizrenin më tej,” ka shkruar Totaj.
Ai ka falënderuar kryetarin e degës së LDK-së në Prizren, Driton Selmanaj, për mbështetjen dhe ka theksuar se “rrugëtimi i përbashkët +4 për Prizrenin” është një angazhim për të mirën e qytetit dhe qytetarëve të tij.
“Në jetë kam ndjekur parimin e gjithëpërfshirjes, të bashkimit dhe afrimit me qëllim të afirmimit të të mirave publike. Kam punuar me profesionistë të bindjeve të ndryshme politike, por çdo herë kam ndjekur rrugën e drejtësisë, barazisë dhe respektimit të ligjit. Në mandatin e parë si kryetar i Prizrenit e dëshmuam me punë të mira, por pa e ndryshuar rrugën e gjithëpërfshirjes dhe bashkëpunimit me të gjithë për të mirën e qytetit tonë.
Sot jam i lumtur ta ndaj lajmin e arritjes së koalicionit për bashkëqeverisje me LDK-në, i bindur se idetë e reja dhe përvoja e kësaj force politike do t’i shërbejnë Prizrenit edhe më shumë. E falendëroj udhëheqjen e kësaj partie dhe kryetarin e degës në Prizren, Driton Selmanaj për besimin dhe mbështetjen në balotazh duke dëshmuar se para Prizrenit dhe qytetarëve të tij, interesat partiake mbesin në rendin të dytë.
Prizren urime dhe na priftë e mbara! Rrugëtojmë bashkë +4 për Prizrenin e të gjithëve dhe për të gjithë!” – përfundoi Totaj.
Me këtë aleancë, PDK dhe LDK do të përballen me kandidatin e Lëvizjes Vetëvendosje, Artan Abrashi, në balotazhin e 9 nëntorit.
