Deputetja e LDK-së, Hykmete Bajrami mbrëmë deklaroi se në Lidhjen Demokratike të Kosovës nuk ka vend për Vjosa Osmanin më. Madje ajo tha se për faj të Osmanit, LDK-ja kishte rënë në 12%, shkruan Reporteri.net.
E ndaj kësaj deklarata kanë reaguar nga Presidenca e Kosovës.
Këshilltarja e Presidentes Osmani, Donika Kadaj-Bujupi ka thënë se nuk i duket normale që një deputete e Kuvendit të Kosovës, si dhe profesoreshë universitare të mos i duket problem lista serbe, e ndërsa ta sulmojë Presidenten “pa asnjë motiv racional”.
Në postimin e saj në Facebook, Kadaj-Bujupi thotë se po ju shkoi mendja për betejë me Presidenten, të mos ankohen për rezultatet më pas, pasi edhe 12 % do ju duket i mirë.
“Nuk ka asnjë kuptim e rezon shtetëror që një deputete e Kuvendit të Republikës së Kosovës, profesoreshë universitare e madje nënkryetare e një partie tradicionale në politikën tonë, të mos ketë asnjë problem me subjektin më agresiv kundër shtetësisë sonë – Listën Serbe – por të zgjedhin të sulmojnë publikisht në një emision televiziv Presidenten e Republikës, pa asnjë motiv racional. Ato sulme po vazhdojnë edhe sot me gjuhë ofenduese e përplot shpifje e tentim denigrim.
“Çfarë dëmi i ka bërë Kosovës Presidentja? Asnjë. Përkundrazi, ajo punon çdo ditë pa u ndalur për ta forcuar shtetin, sovranitetin dhe integritetin territorial të vendit.”
“Cila është porosia që deputetja në fjalë ka dashur t’u përcjellë qytetarëve me këtë qëndrim? Mbetet të besohet se nuk i ka llogaritur mirë fjalët dhe emocionet, sepse vështirë të besohet që dikush të mos ketë problem me Listën Serbe, por të ketë problem me Presidenten e vendit të vet. Vetëm urrejtja patologjike mund të verbojë dikë kaq shumë sa që me dhjetëra herë t’i referohet Kreut të Shtetit vetëm me ‘Vjosa Osmani’ e jo si Presidente, logjikë kjo që e shohim vetëm në mediat e Serbisë.
“Presidentja Osmani nuk është person privat, por Presidente e Republikës së Kosovës që para se të zgjedhet nga Kuvendi mori bekimin e mbi 300 mijë votave të popullit të Kosovës. Këtë besim e mori sepse mbrojti të vërtetën dhe dinjitetin shtetëror. Juve mund edhe t’ju shkoje mendja ndonjëherë të filloni beteja me Presidenten, por pastaj mos u ankoni për rezultatet zgjedhore, se edhe 12 përqindëshi do ju duket i mirë”, shkruan Kadaj-Bujupi në Facebook.
/Reporteri.net/
