Bekim Salihu nga Instituti GAP, ka komentuar koalicionet mes partive politike nëpër komunat të cilat më 9 nëntor do t’i nënshtrohen procesit të balotazhit.
Salihu në emisionin “Interaktiv” në KTV, tha se të dhënat tregojnë që Lëvizja Vetëvendosje në Prishtinë ka mobilizuar strukturat e saj që të kontaktojnë me strukturat e PDK-së për ndonjë koalicion qoftë edhe joformal.
“Të dhënat tregojnë që Vetëvendosje është e interesuar për votat e PDK-së në Prishtinë. Ka mobilizuar strukturat e saj në Prishtinë që të kontaktojnë me strukturat e PDK-së, me qëllim që të krijohet një koalicion formal ose joformal me qëllim të marrjes së kësaj vote. A kanë arritur diçka në këtë drejtim, këtë informacion nuk e kam”, deklaroi Salihu.
Deklaratën e nënkryetarit të PDK-së, Enver Hoxhaj se do ta votonte Përparim Ramën në balotazh, Salihu e quajti mesazh për votuesit e partisë së tij.
“Është dërgim mesazhi. Enver Hoxhaj si person dhe personalitet në PDK ka ndikim, ka emër, ka një imazh të pranueshëm te struktura e PDK-së përgjithësisht dhe natyrisht që pozicionimi i tij ose deklarimi i tij e dërgon një mesazh dhe unë mund ta kuptoj edhe si një lloj përpjekje për ta mobilizuar votën e PDK-së në favor të Përparim Ramës në Prishtinë. Edhe sinjalet e tjera që i ka dërguar PDK-ja në periudhën e fundit lënë të kuptojnë që më shumë PDK-ja do të pozicionohet në përkrahje të LDK-së, e më pak ka gjasa të pozicionohet në përkrahje të LVV-së. Nëse kjo ndodhë, Përparim Rama krijon një avantazh absolut”, deklaroi Salihu.
Në Prishtinë, kandidati i LDK-së Përparim Rama së fundmi ka bërë koalicion kandidatin e AAK-së Bekë Berisha. PDK-ja, deri më tani nuk është deklaruar nëse është në mbështetje të LDK-së.
Gara interesante, sipas Salihut pritet të jetë edhe në Komunën e Gjilanit dhe Prizrenit, veçanërisht në Prizren pasi partia turke akoma nuk është pozicionuar.
“Nuk e di nëse është zyrtare që PDK-ja po e mbështetë LDK-në por nuk ka ndonjë koalicion zyrtar në Gjilan. Interesante duket se gara do të jetë në Prizren edhe për shkak të koalicioneve. E vetmja parti që atje mund ta bëjë diferencën është partia turke që akoma nuk është pozicionuar. Emilja Rexhepi është pozicionuar për LVV-në, Duda Baljen për PDK-në por akoma nuk është pozicionuar partia turke e cila në Prizren ka diku 5 mijë vota”, deklaroi Salihu.
Gara e balotazhit mbahet më 9 nëntor. Këtij procesi do t’i nënshtrohen 17 komuna, dërisa në 13 prej tyre janë krijuar koalicione. Aleanca më e shpeshtë është ajo mes PDK-së dhe LDK-së.
