Ridvan Muharremi, i akuzuar në rastin e rezervave shtetërore, pronar i restaurantit “Bukë e Zemër”, kishte qenë ‘koka’ dhe njeriu më i besueshëm i Rozeta Hajdarit në pazaret për rezervën.
Kështu të paktën del nga aktakuza e Prokurorisë Speciale e ngritur nga prokurorët Valdet Gashi e Milot Krasniqi.
Në aktakuzën e siguruar nga Nacionale thuhet se fuqia e ‘Ridit’ ishte aq e madhe, sa ai përveç që i gjeti operatorët ekonomikë, negocioi blerjen e mallrave, ishte i fuqishëm të bënte edhe ndryshime në planifikimet e Ministrisë së çfarë sasie e mallit duhet të blehet.
Në listën e provave materiale të dy prokurorëve Gashi e Krasniqi, janë edhe disa biseda në aplikacionin “WhatsApp” të cilat dëshmojnë se si Rid Muharremi kishte pasur rolin kryesorë në këto pazare.
Ministria e Tregtisë dhe Industrisë kishte planifikuar që t’i blente rreth 90 mijë litra vaj për rezervën. Megjithatë nga këto biseda, nuk ishte pajtuar Muharremi. Ky i fundit kishte propozuar që të blehen 200 mijë litra vaj.
Fjala e Ridvan Muharremit ishte “urdhër” për punëtorët e Ministrisë së Tregtisë.
Udhëheqësi i Divizionit për Rezerva, i akuzuari Hafiz Gara, bazuar në prova, del e e kishte përfillur kërkesën e Muharremit dhe me Email e njofton se vajin e ka shtuar në 200 mijë litra.
“Mjesi Rid, sasinë e vajit e rrita në 200 mijë litra, jam tuj punue në kontrata, ti përcjelli sapo ti kompletoj”, thuhet në Emailin e paraqitur nga aktakuza e Prokurorisë Speciale.
Në fakt, nga të gjitha komunikimet që ka siguruar Prokuroria Speciale, del se Muharremi kishte qenë njeriu më i besueshëm i Rozeta Hajdarit. Asnjë komunikim nuk bëhej pa e ditur ‘Ridi’. Madje, disa herë Hajdari e kishte telefonuar në prezencë të zyrtarëve të MINT.
“Nga provat materiale vërtetohet fakti se Ridvan Muharremi ka luajtur rol kyç duke ndihmuar në gjetjen e operatorit, zhvillimin e bisedës për marrëveshje dhe finalizimin e kontratës”, thuhet në aktakuzën e siguruar nga Nacionale.
Kontrata ishte lidhur me kompaninë Xanto, të udhëhequr nga Tomasz Tokarski, ku Ridvan Muharremi e kishte vënë në kontakt ministren Hajdari me këtë person, e që pronari më pas e kishte dërguar edhe ofertën.
Madje, Ridvan Muharremi bazuar në Emailet e Prokurorisë, iu tregonte zyrtarëve të MINT se në cilin vend duhet të dërgohet sasia e grurit, edhe pse vendi është sekret, dhe Muharremi nuk kishte leje të sigurisë për të pasur qasje në këtë informacion.
Kjo fuqi e ‘Ridit’ kishte bërë që udhëheqësi i Rezervave, i akuzuari Hafiz Gara, të mendonte se Muharremi ishte këshilltar i Rozeta Hajdarit.
“I pandehuri shton se sjellja nga Ridvan Muharremi në raport me stafin dhe ministren Rozeta Hajdari, kishte menduar se i njëjti ishte këshilltar i jashtëm i ministres”, thuhet në aktakuzë.
I akuzuari, në dëshminë e tij e pranon se “Ridi” kishte autoritet mbi ta. “Në bazë të sjelljeve dhe trajtimit të tij nga ministrja, lirisht mund të them që ka qenë autoritet mbi ne”, thuhet në aktakuzë.
Gara ka theksuar se kishin qenë të obliguar nga ministrja Hajdari që t’i besonin Muharremit.
“I pandehuri deklaron se nuk kishin bërë asnjë verifikim të kompanis Xanto, ngase i kishin besuar ndërmjetësuesit Ridvan Muharremi sepse kishin qenë të obliguar nga ministrja Rozeta Hajdari t’i besojmë të njëjtit”, thuhet në aktakuzë.
Madje, sipas dëshmisë, presioni nga ministrja Hajdari kishte qenë i madh që bisedimet të bëhen vetëm dhe direkt me Ridvan Muharremin.
“I pandehuri e pohon se nuk kanë vepruar drejt kur bisedimet lidhur me kushtet e kontratave dhe pagesave i kishin bërë me Ridvan Muharremin, por presioni kishte qenë i madh nga ministrja Rozeta Hajdari dhe sekretari Irfan Lipovica”, thuhet në aktakuzë.
