Komisioni Qendror i Zgjedhjeve (KQZ) ka miratuar sot rekomandimin për themelimin e një komisioni të posaçëm që do të vlerësojë fletëvotimet dhe përputhjen e numrit të tyre në vendvotime për raundin e dytë të zgjedhjeve për kryetarë komunash për zgjedhjet e raundit të dytë për Kryetar të komunave Mitrovicë e Jugut dhe Gjakovës.
Sipas vendimit të KQZ-së, Komisioni do të bëjë vlerësimin dhe verifikimin e fletëvotimeve dhe përputhjes së tyre në Qendrën e Numërimit dhe Rezultateve, pas pranimit nga Komisionet Komunale të Zgjedhjeve.
Po ashtu, puna e këtij komisioni do të jetë në funksion të përgjigjes për Panelin Zgjedhor për Ankesa dhe Parashtresa pas ankesës së parashtruar në këtë institucion lidhur me zgjedhjet e raundit të dytë për Kryetar të Komunës në Mitrovicën e Jugut.
Drejtori i Zyrës për Regjistrim, Certifikim dhe Kontroll Financiar të Subjekteve Politike, Besnik Buzhala, tha se në raportet e pranuara nga komisionet komunale të zgjedhjeve në Mitrovicë dhe Gjakovë janë evidentuar gabime në kodet e vendvotimeve në fletëvotime – gabime që kanë ndodhur gjatë procesit të shtypjes.
“Në raportet e pranuara nga komisionet komunale të zgjedhjeve në Mitrovicë dhe Gjakovë janë evidentuar problematika në kodet e vendvotimeve në fletëvotime, të cilat kanë ndodhur gjatë shtypjes. Prandaj, rekomandohet formimi i një komisioni që do të bëjë vlerësimin e fletëvotimeve dhe përputhjes së numrit të tyre në Qendrën e Numërimit dhe Rezultateve, për të siguruar një verifikim të detajuar të fletëvotimeve të përdorura dhe atyre të përgjithshme”, ka deklaruar Buzhala.
Ndërkaq, kryetari i KQZ-së, Kreshnik Radoniqi, njoftoi se është pranuar një raport nga kompania “Cetis”, e cila ka shtypur fletëvotimet, ku janë konstatuar disa raste të kodeve të gabuara. Sipas tij, ky raport do të shërbejë për hetimet e Prokurorisë dhe për përgjigjen që do t’i dërgohet PZAP-së.
“Para një ore kemi pranuar raportin nga kompania ‘Cetis’, ku saktësohen të gjitha dërgesat e fletëvotimeve të printuara. Në disa prej tyre, sidomos në dënget e fundit, janë vërejtur fletëvotime me kode të vendvotimeve të ndryshme. Raporti do të trajtohet në përputhje me kutitë e mbyllura të votimit për Mitrovicë dhe Gjakovë. Këto të dhëna do të jenë pjesë e raportit për Prokurorinë dhe PZAP-në”, ka thënë Radoniqi.
Ai shtoi se për komunat tjera do të merren mostra për të parë nëse bëhet fjalë për një problem të përsëritur, ndërsa theksoi se hetimet për këtë çështje tashmë janë hapur në Prokurori.
