Ministri në detyrë, Hekuran Murati, ka paralajmëruar se do të dorëzojë padi për shpifje ndaj kryetarit të Prishtinës, Përparim Rama, rreth buxhetit të Prishtinës.
Rama pak minuta më parë tha se Murati po vazhdon të mbajë të bllokuara 33 milionë euro për kryeqytetin dhe tha se gjendja me buxhetin e Prishtinës është rezultat i vendimeve politike të Muratit.
“Përparim, thuaj Lumirit bashkë me deputetët tjerë le ta votojnë buxhetin e Komunës së Prishtinës për vitin 2025 në Kuvend. Kaq e thjeshtë është. Përkundër gjendjes faktike pa buxhet të miratuar në Kuvend, dhe sqarimeve shterruese tash e disa herë nga ana ime, Përparim Rama bashkë me Shkëmb Manajn edhe sot paskan vazhduar me shpifje se gjoja unë e paskam bllokuar buxhetin e Komunës së Prishtinës. Normalisht që kjo është e pavërtetë, sepse në situatë të njëjtë gjenden edhe Gjilani e Zubin Potoku, komuna që njësoj sikurse Prishtina nuk kanë arritur ta miratojnë buxhetin brenda afateve ligjore”.
Murati tha se meqë “sqarimet publike” s’po kryejnë punë, do t’i drejtohet gjykatës për Ramën dhe për të tjerët që e akuzojnë për bllokim.
“Por meqenëse sqarimet publike nuk duket se po kryejnë punë, atëherë jam i detyruar që të dorëzoj padi për shpifje ndaj Përparim Ramës, por edhe kujtdo tjetër që vazhdon të dezinformojë për gjoja vendime për bllokim të buxhetit”./Express/
