Në Qendrën e Numërimit dhe Rezultateve po vazhdon procesi i vlerësimit të votave të diasporës për balotazhin e 9 nëntorit.
Zëdhënësi i KQZ’së, Valmir Elezi, në një prononcim për GazetaBlic, ka deklaruar se deri tani janë vlerësuar mbi 9 mijë e 80o fletëvotime nga rreth 13 mijë sa janë gjithsej.
Elezi bëri me dije se nga fletëvotimet e vlerësuara, janë aprovuar 7 mijë e 240 dhe janë refuzuar 2 mijë e 570, kryesisht shkaku i mungesës së dëftesës së regjistrimit.
“Në Qendrën e Numërimit dhe Rezultateve është duke vazhduar procesi i vlerësimit të pakove me fletëvotime nga votimi me postë jashtë Kosovës, që i takojnë zgjedhjeve të raundit të dytë për Kryetarë të 18 komunave dhe që ka për qëllim të vërtetojë nëse këto pako janë dërguar votuesit e regjistruar. Deri të premten, në orën 10:00, nga pjesa e pakove me fletëvotime që janë sjellur në Kosovë, procesit të vlerësimit i janë nënshtruar më shumë se 9,800, prej të cilave janë aprovuar më shumë se 7,240, ndërkaq janë refuzuar rreth 2,570. Arsyeja më e shprehur se përse janë refuzuar këto pako është sepse në 2,500 raste mungon dëftesa e regjistrimit, një dokument me të dhëna unike, që votuesi i regjistruar e pranon nga KQZ”, ka thënë Elezi për GazetaBlic.
Në fund të këtij procesi të vlerësimit, KQZ ka thënë se do të publikojë të dhënat për numrin e pakove me fletëvotime të supozuara, të cilat do të numërohen në QNR.
Më 11 dhe 12 nëntor, nga kutitë postare të KQZ-së në 22 shtete të ndryshme të botës, është bërë tërheqja e 13,084 pakove të supozuara me fletëvotime, të cilat i takojnë votimit me postë jashtë Kosovës në raundin e dytë të zgjedhjeve për Kryetarë të 18 komunave. Deri më tani, pjesa më e madhe e tyre janë sjellur në Kosovë.
