Profesori i shkencave politike, Basri Muja, vlerëson se mandatari Glauk Konjufca nuk ka pasur përpjekje këtyre ditëve për të krijuar shumicën e nevojshme për formimin e Qeverisë.
Në një intervistë për rtv21 profesori Muja thotë se nuk është vonë për arritjen e një marrëveshje politike nëse ka vullnet midis partive politike. Por, duke vlerësuar se partitë e ish-opozitës kanë kundërshtuar bashkëpunimin me LVV-në, profesori Muja thotë se vendi është më afër zgjedhjeve të jashtëzakonshme.
‘’Unë nuk kam parë ndonjë aktivitet të zotit Konjufca për krijimin e një shumice për Qeverinë. Por, edhe gjuha e partive të tjera nuk ka lënë shumë hapsirë që ndonjëra prej tyre është e gatshme që jetë pjesë kësaj Qeverie, apo ta përkrahë një Qeveri të pakicës. Unë nuk jam optimist dhe nuk pres që gjatë kësaj kohe do të kemi një Qeveri të re”, tha Muja./RTV21/21Media
