Deputeti i VV-së, Mefail Bajqinovci, ka thënë se partia të cilës i takon është fituese e zgjedhjeve lokale.
Ai për dokumentarin Expose të Gazeta Blic, ka thënë se VV është partia me rritjen më të madhe, teksa ka fituar 7 komuna në këto zgjedhje.
“Padyshim, Lëvizja Vetëvendosje është partia fituese e këtyre zgjedhjeve. Këtë e kemi edhe me rezultat, për shkak se ne nga katër komuna të cilat i kemi ruajtur, i kemi fituar edhe tri të tjera dhe jemi shtrirë ngadalë në gjithë territorin e Republikës së Kosovës në nivelin lokal. Dhe padyshim kjo është tregues që Lëvizja Vetëvendosje nga niveli qëndror në mirëmenaxhim, por edhe në nivelin lokal në katër komunat ku kemi qenë, e kemi treguar që puna e mirë e cila është bërë, prapë i kemi rifituar dhe i kemi fituar edhe tri të tjera të cilat tashmë mund të themi lirshëm, jemi një prej partive që më shumë jemi rritur në nivelin lokal. Keni fituar edhe komuna më shumë, përveç atyre që i keni luajtur, domethënë, në zgjedhjet e të kaluara”, ka thënë Bajqinovci.
Sipaa tij, pritje kanë pasur edhe për fitoren e Komunës së Prishtinës.
“Po, ne kemi pritur që t’i fitojmë edhe edhe disa komuna të tjera, përfshirë edhe komunën e Prishtinës, por ja që kjo ishte ky ishte verdikti i sovranit, por njerëzit duhet të ditur që në Prishtinë kanë qenë të gjitha partitë politike kundër një partie. Në këtë rast e kemi pasur komplet partitë politike të cilat kanë qenë, të cilat ishin me LDK-në, u bënë bashkë dhe normalisht që rezultati doli kështu si doli”, ka vlerësuar deputeti.
Por, a ka pasur befasi në ndonjë komunë për VV-në?
Bajqinovci mohon befasitë, pasi thotë se kanë pritur fitore në të gjitha ato komuna që i kanë fituar.
“Jo, ne e kemi ditur që në Mitrovicë dihet se sa është punuar. Po ashtu edhe në në Fushë Kosovë, në Obiliq, kanë qenë në të gjitha sondazhet, po edhe në opinionin publik ka qenë që fitorja është e Lëvizjes Vetëvendosje, por edhe në disa komuna të tjera, por e thashë edhe njëherë, ju e keni parë që në asnjë komunë Lidhja Demokratike e Kosovës nuk ka shprehur dëshirën që të jetë në koalicion me Lëvizjen Vetëvendosje. E keni parë se çfarë ka ndodhur në Vushtrri, ku gjatë menjëherë pas një nënshkrimi, ka ndërhyrë kryesia e Lidhjes Demokratike të Kosovës dhe e ka dëmtuar procesin duke mos e lejuar kryetarin Xhafer Tahirin që strukturat e tyre të ndihmojnë Lëvizjen Vetëvendosje”, ka deklaruar deputeti Mefail Bajqinovci.
