Kreu i AAK-së, Ramush Haradinaj, gjatë fjalimit të tij në Kuvend ka përmendur edhe projektet e papërfunduara gjatë qeverisë Kurti II, përfshirë rrugën për Mitrovicë, për Gjilan, për Pejë e për Gjakovë.
Duke mos pasë përgjigje për këtë, ushtruesi i detyrës së ministrit në detyrë për Mjedis, Planifikim Hapësinor dhe Infrastrukturë, Hysen Durmishi, sulmoi Haradinajn, duke thënë se “i kanë mbetë merak Ramushit puna e autostradave”.
“Aq shumë merak i keni pasur autostradat, sa që prej asaj kohe keni dënime e aktakuza për keqpërdorim e korrupsion. Për Mitrovicë rruga veç po përfundon. Për Pejë i kemi nënshkruar kontratat 150 milion euro më lirë se ç’i kishit planifikuar ju, nga 240 milion, tash po bëhet për më pak se 90 milion euro. Problemet që na i keni lënë ju po e ngadalësojnë rrugën për Gjakovë, por tash do të kryhet me procedura të rregullta ligjore, jo me improvizime dhe abuzime”.
Durmishi tentoi edhe të parashikojë të ardhmen politike të Aleancës për Ardhmërinë e Kosovës pas zgjedhjeve të reja.
“Nuk e votuat qeverinë që kështu do të mbeteshit në opozitë, por megjithatë do të ishit në kuvend. Tash, Kuvendin e Kosovës, mund ta shihni vetëm në TV sepse jeni larg nga pragu”, shkroi Durmishi.
