Kreu i PDK-së, Bedri Hamza, ka njoftuar se po qëndron në Shtetet e Bashkuara të Amerikës dhe se sot në Washington është takuar me Ndihmësin Special të presidentit Donald Trump, Charles McLaughlin dhe Mark Fleming, drejtor i Zyrës për Evropë Perëndimore dhe Qendrore në kuadër të Departamentit Amerikan të Shtetit.
Hamza ka thënë se kjo vizitë e tij në Ëashington është në funksion të ruajtjes dhe thellimit të bashkëpunimit me Shtëpinë e Bardhë dhe qeverinë amerikane.
Në këtë takim, kreu i PDK-së ka thënë se kanë biseduar për zhvillimet politike dhe për nevojën që institucionet e Kosovës të fokusohen në forcimin e aleancës me SHBA-në përmes një agjende të qartë zhvillimi.
Hamza në njoftim thotë se ka siguruar zyrtarët amerikanë se për të si kryetar dhe për PDK-në, interesi shtetëror është mbi të gjitha.
“I sigurova zyrtarët amerikanë se për mua dhe PDK-në, interesi shtetëror është mbi çdo gjë: përqendrim në rritje ekonomike, investime strategjike dhe riparim të plotë të marrëdhënieve me partnerët tanë ndërkombëtarë. Kosova është e bekuar me mbështetjen e popullit dhe qeverisë amerikane. Kjo mbështetje mbetet jetike në rrugëtimin tonë drejt anëtarësimit në NATO dhe BE”, ka shkruar Hamza.
Postimi i plotë:
Në funksion të ruajtjes dhe thellimit të bashkëpunimit me Shtëpinë e Bardhë dhe qeverinë amerikane, sot në Ëashington zhvillova një takim me Charles McLaughlin, Ndihmës Special i Presidentit Donald Trump dhe Drejtor i Lartë për Evropën dhe Rusinë në Shtëpinë e Bardhë, pranë Këshillit të Sigurisë Kombëtare, si dhe me Mark Fleming, Drejtor i Zyrës për Çështjet e Evropës Perëndimore dhe Qendrore në Departamentin e Shtetit.
Diskutuam për zhvillimet politike dhe ekonomike, si dhe për nevojën që institucionet e Kosovës të fokusohen në forcimin e marrëdhënieve strategjike me SHBA-në dhe në një agjendë të qartë zhvillimi.
I sigurova zyrtarët amerikanë se për mua dhe PDK-në, interesi shtetëror është mbi çdo gjë: përqendrim në rritje ekonomike, investime strategjike dhe riparim të plotë të marrëdhënieve me partnerët tanë ndërkombëtarë.
Kosova është e bekuar me mbështetjen e popullit dhe qeverisë amerikane. Kjo mbështetje mbetet jetike në rrugëtimin tonë drejt anëtarësimit në NATO dhe BE.
