Agjencia e Statistikave të Kosovës ka publikuar shifrat e reja për Indeksin e Kostos së Ndërtimit, të cilat tregojnë se çmimet në sektorin e ndërtimtarisë kanë vazhduar të rriten edhe në tremujorin e tretë të vitit 2025.
Sipas raportit, kostot totale janë rritur me 0.5% krahasuar me tremujorin e dytë dhe me 3.6% krahasuar me periudhën e njëjtë të vitit 2024.
Rritja tremujore është shkaktuar kryesisht nga çmimet e energjisë, që kanë shënuar një ngritje të ndjeshme prej 3.9%, si dhe nga rritja e pagave me 2.3%.
Materialet, pavarësisht një rritjeje modeste prej 0.1%, vazhdojnë të mbeten komponenti më i rëndë i kostove me peshë 69.8% në strukturën totale.
Në krahasim me TM3 2024, rritja është edhe më e theksuar: energjia ka shënuar një rritje vjetore prej 9.7%, pagat 7.8%, ndërsa materialet 2.9%.
“Indeksi i Kostos të Ndërtimit (IKN) për tremujorin e tretë 2025 Indeksi i tërësishëm i Kostos të Ndërtimit në Kosovë (IKN) pati rritje për (0.5 %) në tremujorin e tretë (TM-3) – 2025 krahasuar me tremujorin e dytë (TM-2) 2025. Krahasuar me të njëjtën periudhë të vitit paraprak (TM-3) – 2024 Indeksi i Kostos të Ndërtimit pati rritje për (3.6 %). Tremujori i tretë 2025 – Tremujori i dytë 2025, 0.5 % Indeksi i tërësishëm i Kostos të Ndërtimit në Kosovë (IKN) pati rritje për ( 0.5%) në tremujorin e tretë(TM-3) 2025 krahasuar me tremujorin e dytë (TM-2) 2025. Rritje kishte energjia (3.9%),pagat (2.3%),kostot tjera (1.0%),materialet (0.1%) dhe Zbritje kishte te makineritë (-0.7%).” – thuhet në raportin e ASK-së.
