Rajoni.org ka dërguar disa pyetje ndaj ish-Drejtorit për Shëndetësi dhe Mirëqenie Sociale në Komunën e Fushë Kosovës, Hysen Sllamnikut, lidhur me pretendimet për punësimin e dy aksionarëve të afërm me të në komunën e Fushë Kosovës. Bëhet fjalë për Hasim Sllamnkun dhe Florim Sllamnikun, të cilët sipas burimeve rajoni.org dyshohet se janë punësuar gjatë kohës sa Sllamniku ushtronte funksion të lartë në këtë institucion.
Fillimisht, Rajoni ka dërguar këto pyetje ish drejtorit Sllamniku:
1. A janë punësuar në Komunë ortaket tuaj, Hasim Sllamniku dhe Florim Sllamniku?
2. Në cilat pozita janë punësuar?
3. A keni ushtruar ndikim në punësimin e tyre?
4. Çfarë lidhjeje familjare apo tjetër keni me ta?
Në përgjigjen e tij fillestare, Hysen Sllamniku ka mohuar që Hasimi dhe Florimi të jenë ortakë, duke sqaruar se ata janë vetëm aksionarë në “Ferma Fushë Kosova SH.P.K”:
“Hasim Sllamniku dhe Florim Sllamniku nuk janë ortak por aksionarë në Fermën ‘Fushë Kosova SH.P.K’. Nuk janë vetëm këta të dy me mbiemrin Sllamniku. Jemi familje me mbi 120 shtëpi që jetojmë në Henc, Vragoli, Miradi e Ultë, Fushë Kosovë, Prishtinë etj.”
Ai më tej ka mohuar kategorikisht që ata të jenë ndonjëherë të punësuar në komunë:
“Më vjen keq por Hasim Sllamniku dhe Florim Sllamniku nuk janë dhe s’kanë qenë kurrë të punësuar në Komunë.”
Sa i përket lidhjeve familjare, Sllamniku ka konfirmuar së i ka të afërm.
“Hasimin e kam djalë të vëllaut, ndërsa Florimin e kam kushëri të afërt (djalin e djalit të agjës).”
Mirëpo, pas dërgimit të dokumenteve të Rajoni.org, ku dëshmohet punësimi i Hasim dhe Florim Sllamnikut në Komunën e Fushë Kosovës, ish-drejtori nuk ka kthyer më përgjigje.
Ai nuk është deklaruar as pas insistimit të rajonit për të marrë një qëndrim të dytë.
