Gjuha e kryeministrit dhe liderit të Lëvizjes Vetëvendosje, Albin Kurti, ndaj opozitës duket se është zbutur ndjeshëm pas shpalljes së rezultateve preliminare të sontme të zgjedhjeve. Në kontrast me deklaratat e mëhershme, kur opozitën e kishte cilësuar me fjalor fyes, Kurti sonte ka bërë thirrje për bashkëpunim institucional.
Pas rezultatit të zgjedhjeve të 9 shkurtit, ai e quajti opozitën “hajvanë”, ndërsa sonte veproi ndryshe.
Gjatë një konference për media, Kurti ftoi partitë opozitare që të bashkëpunojnë në Kuvend, veçanërisht për çështje me rëndësi shtetërore dhe marrëveshje ndërkombëtare.
“Në Kuvendin e legjislaturës së dhjetë po na pret Plani i Rritjes së BE-së në vlerë prej 880 milionë euro, prej të cilave dy të tretat janë kredi dhe një e treta grante, si dhe tri marrëveshje me Bankën Botërore në vlerë prej 120 milionë euro. Pra, mbi 1 miliardë euro gjithsej. Ftoj që nga tani partitë opozitare për bashkëpunim në Kuvend për marrëveshjet ndërkombëtare, ligjet e mira që do t’i procedojmë dhe për interesin publik të qytetarëve”, ka deklaruar Kurti.
Ai ka shtuar se bashkëpunimi me opozitën është i domosdoshëm edhe për çështje të tjera të rëndësishme institucionale, përfshirë edhe procesin që lidhet me zgjedhjen e presidentit të vendit.
“Edhe për çështjen e presidentes duhet konsultim me opozitën”, tha ai./Insajderi
