Në pranverën e vitit 2026, i përfundon mandati, e Vjosa Osmani synon që në krye të vendit të qëndrojë edhe për një mandat tjetër.
Prijëse të vendit, ajo thotë se e duan 81 për qind e qytetarëve të Kosovës.
Osmani tha se me këtë ambicie të saj janë njoftuar të gjitha partitë politike në vend.
“Nuk ka parti politike, përveç Listës Serbe, nuk ka parti politike që në një mënyrë apo tjetër, nuk ka qenë e informuar që qëllimi im do të jetë që t’i siguroj Republikë së Kosovës vazhdimësi të këtyre punëve të mira, në qoftë se edhe ata pajtohen”, theksoi ajo për Kiks Kosova.
Në rast se partitë votojnë për t’ia siguruar asaj edhe një mandat presidencial, Osmani thotë se do të respektoheshin dy parime thelbësore; mbrojtja e interesit të vendit, pasi sipas saj do të vazhdoheshin punët e mira që ka nisur ajo dhe, reflektimi i vullnetit qytetar, pasi pohon se sondazhet e OJQ-ve kanë rezultuar se 2/3 apo në disa raste, 81 për qind e qytetarëve kërkojnë një mandat të dytë nga ajo si presidente.
Megjithatë, në qoftë se subjektet politike nuk ia bëjnë kuorumin dhe votat për rizgjedhjen e saj në krye të vendit, Osmani paralajmëron partitë se do ballafaqohen në zgjedhje me të.
“Në fund të fundit është në vullnetin e deputetëve, që vendosin nëse do të më përkrahin apo jo, dhe po e them përsëri, në qoftë se vendosin që po, do të vazhdojmë me punë të mira për vendin, mbrojtje të interesave të qytetarëve, në qoftë se vendosin që jo, atëherë unë e vazhdoj punën në një mënyrë tjetër, nëpërmjet angazhimit politik dhe kurdo që të ketë zgjedhje, atëherë i përballim idetë, nocionet, qëndrimet, energjinë besa e shumëçka tjetër. Por qëllimi im është që të vazhdojë të jem e angazhuar politikisht dhe ta ndihmoj Republikën e Kosovës që të ecë përpara“, tha tutje Osmani.
