Në vitin 2022 ishte raportuar se “Olive Medical” është bërë laboratori i parë në Kosovë i akredituar me standardet ISO 15189, por që disa vite me vonë po del se ky laborator kryen edhe analiza në mënyrë komplet të kundërligjshme e të pasigurt për pacientët.
Në kuadër të hulumtimeve për parregullsitë në sektorin privat të shëndetësisë, Veriu.info ka siguruar një vendim të Inspektoratit Shëndetësor të Ministrisë së Shëndetësisë me të cilin spitali “Oliver Medical Group Sh.P.K.”, me themelues Bekim Murati, është gjobitur me vetëm një (1) mijë euro për shkelje të Ligjit për Shëndetësi, pasi që kjo kompani është konstatuar se ka ushtruar veprimtarinë pa përmbushur kushtet nga neni 40 dhe 42 i këtij ligji.
Në arsyetimin e vendimit të siguruar nga Veriu.info, thuhet se gjatë kontrollimit të regjistrimit të pacientëve në “Olive Medical Group Sh.P.K.” është konstatuar që rezultatet e analizave laboratorike, më datë 26 korrik 2025, janë lëshuar pa praninë e biokimistes, më saktësisht pa praninë e Dr. Ilirjana Frrokaj.
Në këtë vendim citohet se edhe vetë Dr. Ilirjana Frrokaj e ka pranuar se të njëjtat analiza nuk i ka punuar ajo, duke thënë verbalisht: “Këto analiza nuk i kam punuar unë”.
Inspektorati Shëndetësor ka gjetur se në sistemin elektronik të Divizionit për Licencim dhe Akreditim nuk figuron e shtuna si ditë e punës së saj, pasi e njëjta është e lajmëruar për punë nga e hëna deri të premten.
“Në regjistrin e pacientëve u gjetën fakte nga Inspektorati Shëndetësor se në të njëjtën ditë, me datë 26.07.2025, të gjitha rezultatet e analizave biokimike janë lëshuar pa prezencën e biokimistes, ku numri i pacientëve për këtë datë figuron gjithsej 53, e gjithashtu në këto rezultate të analizave laboratorike figuron edhe pacienti me inicialet A.ZH. Të bashkangjitur gjeni inicialet e pacientëve të cilët po me atë datë kanë pranuar rezultatet e analizave nga ky institucion: A.V.-1999, N.B.-2000, V.M.-1983, H.K.-1958, V.P.-1951, H.XH.-1974, F.O.-1973, E.H.-1979, A.A.-1966, G.M.-1971, A.G.-1991, E.G.-1962, D.M.-2001, XH.A.-1959, D.B.-1996, G.S.-1976, A.M.-1972, R.S.-1998, R.B.-1957, D.S.-2016, B.O.-1997, R.P.-2012, O.P.-2014, F.T.M.-1983, E.A.-1979, E.S.-2005, M.A.-2022, H.O.G.-1989, H.Z.-2019, P.H.-1981, G.R.-1994, L.T.-2006, T.F.-2024, M.D.-2003, T.V.-2005, E.S.-1997, I.A.-1935, F.T.M.-1983, V.T.U.-1992, V.B.-1979, S.C.-1974, SH.P.-1969, E.B.-2019, D.K.-2000, V.K.-1997, M.H.-1997, E.M.-2018, K.B.-1989, H.M.-2021, A.ZII.-2009, V.K.-1956, Y.M.-1986, M.I.-2022. Këtë e dëshmon edhe deklarata me shkrim e Dr. Ilirjana Frrokaj, Specialiste e Biokimisë Klinike, e datës 27.08.2025.”, thuhet në vendim.
Veriu.info ka dërguar pyetje në “Olive Medical Group Sh.P.K.” më 11 janar për këtë vendim, por deri në momentin e publikimit të artikullit nuk kemi marrë përgjigje.
Kush është “Olive Medical Group Sh.P.K.” dhe lidhja me politikën?
Në Agjencinë e Regjistrimit të Bizneseve të Kosovës thuhet se “Olive Medical Group Sh.P.K.” është themeluar në vitin 2017, ndërsa 100% të aksioneve i zotëron Bekim Murati.
Në ueb-faqen e “Olive Medical Group Sh.P.K.” shkruan se në kuadër të këtij institucioni privat shëndetësor funksionon Laboratori dhe Klinika.
Vitet e fundit, “Olive Medical Group Sh.P.K.” kishte qenë në qendër të raportimit medial, pasi që Arben Vitia, asokohe ish-ministër i Shëndetësisë, ishte punësuar si drejtor në vitin 2022.
Spitali ku Arben Vitia u punësua si drejtor, licencohet nga Ministria e Shëndetësisë
Pjesë e “Olive Medical Group Sh.P.K.” është edhe bashkëshortja e tashmë ministrit në detyrë të Shëndetësisë, Arben Vitia, i cili vitin e kaluar, me rastin e deklarimit të pasurisë, kishte deklaruar të hyra të bashkëshortes nga ky institucion shëndetësor privat.
Në deklarimin e fundit vjetor të pasurisë, të bërë më 29 mars 2025, Arben Vitia kishte deklaruar se bashkëshortja e tij ka marrë pagesë vjetore prej 30 mijë e 166 euro dhe pagesë për punë jashtë orarit në vlerë prej 4 mijë e 500 euro nga “Olive Medical Group Sh.P.K.”.
Cili është roli dhe rëndësia e biokimistit/es për analiza?
Veriu.info ka bërë kërkime online për rolin dhe rëndësinë e prezencës së biokimistit/es gjatë kryerjes së analizave për pacientë në një laborator, ku del se ai/ajo është thelbësore për të garantuar saktësinë, besueshmërinë dhe interpretimin korrekt të rezultateve.
Praktikisht, biokimisti/ja është përgjegjëse për saktësinë e analizave, pasi që mbikëqyr procesin e analizimit të mostrave, siguron që analizat të kryhen sipas standardeve profesionale dhe protokolleve laboratorike. Po ashtu merret me kontrollin e cilësisë, duke zbatuar kontroll, verifikuar devijimet dhe gabimet teknike, vendos nëse një analizë duhet të përsëritet apo të refuzohet.
Biokimisti/ja analizon rezultatet në kontekst klinik, identifikon vlerat kritike, informon mjekun për rezultate alarmante, sugjeron analiza shtesë apo alternative, siguron trajtim korrekt të mostrave biologjike dhe, në fund, është përgjegjëse për rezultatet e lëshuara.
LEXONI EDHE:
LEXONI EDHE:
