Prokuroria Themelore në Gjakovë të premten ka njoftuar se ka autorizuar Policinë për të ndërmarrë të gjitha veprimet hetimore për dyshimet për manipulime me vota për kandidatët për deputetë në Komunën e Malishevës.
Në njoftim, Prokuroria ka thënë se hetimet do të synojnë identifikimin e personave përgjegjës, grumbullimin e informatave dhe sigurimin e provave relevante.
“Prokuroria Themelore në Gjakovë, mbetet e angazhuar në mbrojtjen e votës së lirë të qytetarëve dhe të trajtojë çdo rast të dyshuar, me synimin e ruajtjes së integritetit të procesit zgjedhor dhe sundimit të ligjit”, thuhet në njoftim.
Malisheva ishte prej komunave që pati 100 për qind vota të rinumëruara. Dhe më së shumti dallavere pati në Partinë Demokratike të Kosovës. Tre kandidatëve të kësaj partie iu hoqën vota të konsiderueshme. Gazmend Maliqajt iu hoqën 927 vota, Fetah Paçarizit 728, i cili gjithashtu pati mbi 6 mijë vota më pak pas rinumërimit në Prizren dhe Adnan Thaqit 703. Hajdar Beqa ka 244 vota më pak e Arbnore Salihu 209.
Nga partitë e tjera, Gëzim Hazrolli i Lidhjes Demokratike të Kosovës pati 340 vota më pak, ndërsa Valon Hoti e Gani Krasniqi të Lëvizjes Vetëvendosje patën 312 respektivisht 271 më pak.
Gjatë ditës së sotme, në Prizren u arrestuan rreth 109 persona mbi dyshimet që kanë bërë dallavere me votat për kandidatët për deputetë.
