Deputeti në parlamentin e Ukrainës, Oleksiy Goncharenko, ka treguar se si e ka dorëzuar në kuvendin shtetëror në Kiev, projektligjin me anë të të cilit vendi i tij duhet ta pranojë pavarësinë e Kosovës.
“Para 24 shkurtit disa thoshin se nëse Ukraina pranon Kosovën atëherë Rusia mund ta arsyetojë çka po ndodhte në Krime dhe Donbas. Por pas 24 shkurtit e gjithë bota tashmë e ka kuptuar se është vetëm pushtim i Rusisë e jo vullnet i vërtetë i popullit. Mendoj që ka ardhur koha që Ukraina ta pranojë Kosovën”, tha Goncharenko për Klan Kosova.
Ligjvënësi i partisë Solidariteti Evropian, të ish-presidentit Petro Poroshenko, thotë se “ Verkhovna Rada” kështu quhet kuvendi ukrainas s’u mblodh ende për të diskutuar projektligjin.
Por parimisht ai mëton se ideja e tij po gjen më shumë përkrahje sesa kundërshti dhe është një nga temat më të diskutuara publike në Ukrainë.
“Kam deklaruar se Ukraina duhet ta mbështesë Kosovën mbase edhe ushtarakisht nëse ka nevojë. Pastaj pranova shumë porosi gjithandej nga serbët përfshirë disa kërcënime. Por mua nuk më bëhet vonë, rusët dy herë deri tani kanë planifikuar të më vrasin, e një herë të më kidnapojnë. Kështu që këto kërcënime janë thjeshtë asgjë”.
Goncharenko, shton se krahasimi i rastit të shpalljes së pavarësisë së Kosovës nga Moska për të arsyetuar pushtimin e territoreve ukrainase s’qëndron assesi.
“Në përgjithësi Serbia po vepron si vegël e Putinit kështu që kjo s’është punë e madhe. Krejt bota po e kupton e po e sheh që po ndodh një pushtim i qartë në vendin tonë një pjesë e të cilit është okupuar dhe aty po kryhet gjenocid. Kështu që situata te ne nuk është e njejtë me Kosovën” shtoi ligjvënësi që foli nga qyteti Odesa, aty edhe ku jeton me familje.
