Atdhe Hetemi, drejtor i Institutit të Krimeve të Kryera gjatë Luftës në Kosovë, është emëruar profesor asistent në Fakultetin e Filologjisë të Universitetit të Prishtinës.
Rektor i Universitetit të Prishtinës është Arben Hajrullahu, bashkëshort i Albana Arbenit. Kjo e fundit ishte punësuar dy vite më parë në pozitën e Zyrtares së Lartë Certifikuese në IKKL, në periudhën kur drejtimin e këtij institucioni e ushtronte vetë Hetemi.
Më 14 janar të këtij viti, Hajrullahu ia nënshkroi Hetemit kontratën e punës, e cila parashihet të zgjasë nga 15 shtatori i këtij viti deri më 14 shtator 2030.
Universiteti i Prishtinës për Insajderin ka bërë të ditur se, me kërkesë të Fakultetit të Filologjisë, është shpallur konkurs i jashtëm për dy pozita të profesorëve asistentë. Sipas UP-së, këto pozita kanë qenë të domosdoshme për procesin e riakreditimit të programit të Ballkanistikës, i cili rrezikonte mbylljen për shkak të mungesës së stafit akademik.
Nga UP-ja kanë deklaruar se procesi i përzgjedhjes është zhvilluar në përputhje të plotë me Statutin e Universitetit dhe me rregulloret përkatëse. Pretendimet për konflikt interesi, për shkak të marrëdhënieve të mëhershme profesionale ndërmjet Hetemit dhe institucionit ku punon bashkëshortja e rektorit, sipas universitetit, nuk qëndrojnë.
“Statuti i Universitetit të Prishtinës dhe rregulloret në fuqi janë të qarta në këtë drejtim dhe nuk lejojnë, në asnjë fazë të procesit të përzgjedhjes, përfshirjen e rektorit si mekanizëm vendimmarrës apo ndikues në përzgjedhjen e kandidatëve për pozitat e shpallura në konkurset e Universitetit të Prishtinës”, thuhet tutje.
Lidhur me pretendimet për konflikt interesin, nga ky institucion kanë thënë se përzgjedhja e kandidatëve zhvillohet në disa nivele kolegjiale, dhe se paportet vlerësuese për të gjithë kandidatët janë publikuar në Buletinin e Universitetit të Prishtinës dhe janë të qasshme për publikun.
“Raportet vlerësuese për të gjithë kandidatët janë publikuar në Buletinin e Universitetit të Prishtinës dhe janë të qasshme për çdo palë të interesuar. Universiteti i Prishtinës ka të përcaktuara qartë dhe në mënyrë të detajuar procedurat për emërimin e personelit akademik, të cilat bazohen në parimin e përzgjedhjes përmes komisioneve vlerësuese të pavarura. Këto komisione propozohen dhe miratohen nga Këshillat e Njësive Akademike dhe, sipas rregullave në fuqi, në përbërjen e tyre nuk mund të përfshihen bartës të funksioneve menaxheriale, përfshirë edhe rektorin”, thuhet në përgjigjjen e Universitetit.
“Në asnjë fazë të këtij procesi nuk ka pasur konflikt interesi apo dukje të konfliktit të interesit”, thuhet në përgjigjen e UP-së, duke shtuar se mekanizmat e kontrollit dhe ankimit e bëjnë të pamundur ndikimin individual në proces.
