Kryetari i Prishtinës, Perparim Rama, ka shprehur pakënaqësinë e tij të fortë për përjashtimin e Buxhetit të Kryeqytetit nga Buxheti i vitit 2026, duke e quajtur këtë një vendim politik dhe jo thjesht një vonesë administrative.
“Buxheti i Kryeqytetit është miratuar në Asamblenë e Kryeqytetit, me të gjitha specifikat teknike dhe ligjore, dhe është dorëzuar sipas procedurave. Çdo justifikim për mospërfshirje bie poshtë kur dokumentacioni është i plotë dhe në përputhje me ligjin”, ka deklaruar Rama në postimin e tij në Facebook.
Ai ka ngritur pyetje për motivet e Qeverisë, duke thënë: “Pse nuk po përfshihet në Buxhetin e vitit 2026? A është kjo hakmarrje politike? A është tentativë për ta bllokuar zhvillimin e Kryeqytetit? A po përdoret buxheti si mjet presioni ndaj qytetarëve të Prishtinës?”.
Rama ka theksuar se Qeveria ka “obligim kushtetues dhe ligjor të trajtojë buxhetin e Kryeqytetit pa diskriminim politik. Çdo veprim ndryshe është shkelje e parimit të barazisë institucionale dhe goditje direkte ndaj qytetarëve”.
“Prishtina nuk është pronë e askujt. Është Kryeqyteti i Republikës dhe meriton trajtim institucional, jo kalkulime partiake. Nëse Qeveria zgjedh ta mbajë peng buxhetin e 2026-tës, atëherë le ta thotë hapur: Po i ndëshkojmë qytetarët sepse nuk kanë votuar neve! Qytetarët e Prishtinës meritojnë përgjigje”, përfundon Rama.
