Veriu.info sot ka publikuar emrat e personave që gjenden në aktakuzën e ngritur nga prokurori Rasim Maloku, ndaj 25 të pandehurve që dyshohen për dhënie të milionave euro me fajde dhe ndaj 2 personave që dyshohen për detyrim.
Kjo aktakuzë është ngritur pas një pune të gjatë hetimore, të cilës i kishin paraprirë aksionet kundër fajdes të kryera në mars dhe maj të vitit 2023 ku ishin bastisur disa shtëpi, lokale e autosallone në shumë qytete të Kosovës.
Në aktakuzën e siguruar nga Veriu.info, e cila është ngritur më 15 dhjetor 2025, Ilir Vershevci akuzohet për katër (4) vepra penale të fajdes, Fitim Vershevci akuzohet për një (1) vepër penale të fajdes dhe Sheqir Vershevci akuzohet për një (1) vepër penale të fajdes.
Sipas aktakuzës së ngritur nga prokurori Rasim Maloku, Ilir Vershevci dyshohet që gjatë periudhës 2020-2022 në auto sallonin e tij “Iliri” ka dhënë vetura me fajde të dëmtuarit Xhevdet Shala, i cili është detyruar të blej një “Ferrari” në vlerë 160 mijë euro të cilin ia ka shitur të pandehurit për 120 mijë euro. Po ashtu, sipas prokurorit, i dëmtuari ka blerë nga Ilir Vershevci një “Audi Q8” në vlerë 85 mijë euro dhe ia ka shitur të pandehurit për 60 mijë euro, sikurse edhe një “Arteon” që e ka blerë në vlerë 28 mijë euro dhe ia ka shitur të njëjtit për 18 mijë euro.
Raporti ‘biznesor’ në mes tyre nuk përfundon vetëm të këto vetura, pasi që në aktakuzë thuhet se i dëmtuari Xhevdet Shala për shkak të obligimeve ndaj personave tjerë për fajde, është detyruar që të shes një pronë të paluajtshme në ‘Veternik’ me sipërfaqe prej një (1) hektar për çmim prej 900 mijë euro, kurse në kontratën për shitjen e saj është shënuar vlera prej 300 mijë euro, me të cilat mjete janë paguar borxhet për veturat e vlera në auto sallonin “Iliri”.
Sipas aktakuzës, Ilir Vershevci shumën prej 600 mijë euro nga blerja e kësaj toke nuk ia ka dhënë shitësit Xhevdet Shala, por e ka ndalur për t’i paguar kinse disa borxhe të të dëmtuarit në auto sallonet e tjera.
Ilir Vershevci dyshohet se i ka përdorur edhe 1 milion euro të të dëmtuarit Xhevdet Shala që janë fituar nga shitja e një prone në Fushë Kosovë, me të cilat i ka paguar disa borxhe të Xhevdet Shalës për disa vetura të blera në auto sallone tjera.
Pronari i auto sallon “Iliri” akuzohet edhe për një rast tjetër të fajdes, pasi që dyshohet se duke shfrytëzuar gjendjen e rëndë nga obligimet e pësuara prej fajdeve të të dëmtuarit B.B., i ka shitur një “Range Rover” për 110 mijë euro të cilin e ka marrë një person tjetër, por i dëmtuari ka paguar 50 mijë euro. Në pamundësi që të paguaj shumën prej 60 mijë euro, Ilir Vershevci ka rritur obligimin ndaj të dëmtuarit B.B. për 30 mijë euro si fajde, duke i kërkuar 90 mijë euro.
Edhe Sheqir Vershevci, vëllai i Ilir, akuzohet për fajde në aktakuzën e ngritur nga prokurori Rasim Maloku më 15 dhjetor 2025. Për Sheqir Vershevcin duket se aksioni i marsit të 2023-tes nuk kishte pasur efekt parandaluar, pasi që i njëjti nga dhjetori i 2023-te kishte detyruar Xhevdet Shalën që t’i dorëzoj një objekt ndërtimor afarist në Fushë Kosovë në vlerë prej 2 milionë euro, në të cilin gjenden edhe disa lokale afariste. Pikërisht për këto lokale që ishin arrestuar Ilir e Sheqir Vershevci, ky i fundit kishte vazhduar edhe më pas të marrë qiratë nga F.H., S.K., J.Sh., B.M. e A.G. në shumë totale prej 3850 euro në muaj.
Përveç vëllezërve Ilir e Sheqir Vershevci, në aktakuzë të njëjtë nën dyshimin për fajde është edhe djali i axhës së tyre Fitimi, i cili dyshohet që në auto sallonin e tij “Fita” i ka shitur të dëmtuarit B.G. dy vetura në vlerë mbi 100 mijë euro, rishitja e të cilave të i njëjti me çmim dukshëm më të lirë është konsideruar nga prokurori si kryerje e veprës penale fajdeja.
Ndryshe, më 2023 Veriu.info kishte raportuar ekskluzivisht për këtë aksion kundër fajdes të udhëhequr nga prokurori Rasim Maloku, ku Fitim Vershevcit ishin sekuestruar 1 DËR, 16 USB dhe 1 shufër metalike, ndërsa Ilir Vershevcit i ishte sekuestruar pasaporta.
Vazhdon….
Shënim: Personat e apostrofuar në këtë artikull prezumohen të pafajshëm, derisa fajësia e tyre të mos provohet me vendim të formës së prerë nga gjykata.
