Veriu.info sot ka publikuar emrat e personave që gjenden në aktakuzën e ngritur nga prokurori Rasim Maloku, ndaj 25 të pandehurve që dyshohen për dhënie të miliona euro me fajde dhe ndaj 2 personave që dyshohen për detyrim.
Kjo aktakuzë është ngritur pas një pune të gjatë hetimore, të cilës i kishin paraprirë aksionet kundër fajdes të kryera në mars dhe maj të vitit 2023 ku ishin bastisur disa shtëpi, lokale e autosallone në shumë qytete të Kosovës.
Gjykata Themelore në Ferizaj ka konfirmuar për Veriu.info se e ka pranuar aktakuzën, duke bërë të ditur se për të akoma nuk është mbajtur shqyrtimi fillestar dhe nuk është bërë konfirmimi i aktakuzës.
Në aktakuzën e siguruar nga Veriu.info, e cila është ngritur më 15 dhjetor 2025, janë edhe tre biznesmenë nga Ferizaj, Fadil Salihu, Besnik (I) Salihu dhe Egzon (I) Salihu.
Për çka akuzohet Fadil Salihu?
Sipas aktakuzës së ngritur nga prokurori Rasim Maloku, Fadil Salihu akuzohet se si pronar i auto sallonit “Besa F” përmes kontraktimit të shumave joproporcionale të pasurisë me të dëmtuarin Samir Bajrami – pronar i kompanisë “Ornela” ka kryer veprën penale fajdeja nga neni 331 i Kodit Penal të Kosovës.
Kjo pasi që i dëmtuari Samir Bajrami për shkak të gjendjes së rëndë financiare dhe obligimeve ndaj personave të tjerë për fajde, më 2022 është detyruar të blejë nga Fadil Salihu një veturë “Range Rover” në shumën prej 44 mijë euro, të cilën menjëherë ia ka shitur të njëjtit për 28 mijë euro. Po ashtu Samir Bajrami ka blerë një “Mercedes” për 25 mijë euro në auto sallon “Besa F” dhe të cilën menjëherë ia ka shitur të pandehurit për 15 mijë euro.
Në aktakuzë përmendet edhe një rast i vitit 2021, ku dyshohet se Fadil Salihu si pronar i auto sallon “Besa F” ka veprën penale të fajdes, për shkak se i ka shitur të dëmtuarit Samir Bajrami një veturë “Mercedes GLS” për 30 mijë, ndërsa i dëmtuari është detyruar menjëherë ta shesë në një auto sallon tjetër për 14 mijë euro, me ç’rast ka mbetur borxh në shumën prej 30 mijë euro tek Fadil Salihu.
Për çka akuzohet Besnik (I) Salihu?
Sipas aktakuzës së ngritur më 15 dhjetor 2025, Besnik Salihu, pronar i auto sallon “Besa”, dyshohet se ka kryer veprën penale të fajdes, për shkak se i ka shitur të dëmtuarit Xhevdet Shala një veturë “Range Rover” për 45 mijë euro dhe menjëherë e ka blerë të njëjtin për 24 mijë euro.
Besnik Salihu akuzohet për fajde edhe për shkak se Xhevdet Shalës ia ka shitur një “Porche” për 85 mijë euro dhe të njëjtën menjëherë e ia ka blerë për 52 mijë euro, sikur qe një “Golf 8” ia ka shitur për 40 mijë euro dhe të njëjtën e ka blerë për 30 mijë euro. Njëjtë ka vepruar edhe më një veturë ‘Mercedes’ të cilin Xhevdet Shala e ka blerë nga Besnik Salihu për 16 mijë euro dhe të njëjtit ia ka shitur për 10 mijë euro.
Aktakuza e prokurorit Rasim Maloku e ngarkon Besnik Salihun edhe me një vepër tjetër të fajdes, pasi që dyshohet se në vitet 2020-2022, i dëmtuari Sami Bajrami ka blerë nga ai një “Range Rover” në vlerë prej 44 mijë euro dhe të cilën menjëherë ia ka shitur të pandehurit për 28 mijë euro, sikurse që ka blerë edhe një “Mercedes” për shumën prej 25 mijë euro dhe të njëjtën ia ka shitur menjëherë Besnik Salihut për 15 mijë euro, me të cilat para i ka paguar fajdet te i pandehuri S.S.
Për çka akuzohet Egzon (I) Salihu?
Në aktakuzën e siguruar nga Veriu.info gjendet edhe emri i Egzon Salihut, i cili dyshohet se ka kryer veprën penale të fajdes, duke i shitur të dëmtuarit Xhevdet Shala një veturë për 37 mijë euro, të cilën të njëjtën ditë ia ka blerë prapë për 20 mijë euro.
Po ashtu Egzon Salihu akuzohet se Xhevdet Shalës i ka shitur një veturë për 55 mijë euro me ‘procedurë’ të njëjtë, duke ia blerë të njëjtën ditë për 40 mijë euro. Për këto dhe vetura tjera, borxhi i Xhevdes Shalës ndaj Besnik Salihut kishte arritur në 250 mijë euro.
Veriu.info më 2023 për aksionin e realizuar nga Prokuroria Themelore në Ferizaj në bashkëpunim me Policinë e Kosovës, kishte raportuar ekskluzivisht për sekuestrimet që u ishin bërë Fadil e Besnik Salihut.
Vazhdon….
Shënim: Personat e apostrofuar në këtë artikull prezumohen të pafajshëm, derisa fajësia e tyre të mos provohet me vendim të formës së prerë nga gjykata.
LEXONI EDHE:
