Kreu i PDK-së thotë se partia e tij nuk i ka numrat për kandidat të vetin dhe se përkrahja për një mandat të dytë të Vjosa Osmanit varet nga procedurat dhe mbështetja parlamentare.
Kryetari i PDK-së, Bedri Hamza, ka deklaruar se aktualisht nuk ekziston asnjë kandidaturë zyrtare për presidente që i ka plotësuar kushtet formale për procedim në Kuvend.
I pyetur në “Debat Plus” nëse PDK do ta mbështesë presidenten aktuale Vjosa Osmani për një mandat të dytë, Hamza theksoi se përveç vullnetit politik, ekzistojnë edhe procedura të qarta kushtetuese.
“Përveç vullnetit është edhe procedura. Për me qenë kandidate apo kandidat duhet të plotësohen edhe kushtet formal-juridike, 30 nënshkrime, duhet të jenë dy kandidatë me nga 30 nënshkrime. Edhe duhet të jenë 80 deputetë në sallë që votojnë. Nuk ka ndonjë kandidaturë zyrtare që i ka 30 nënshkrime dhe janë deponuar ato nënshkrime në Kuvend që të mund të procedohet tutje”, ka thënë Hamza.
Ai shtoi se PDK-ja nuk i ka numrat e mjaftueshëm për ta propozuar një kandidat të vetin për presidente. “PDK nuk i ka numrat e mjaftueshëm që me dhënë kandidatin e vet, duhen edhe tetë. Edhe nëse i ka të siguruara ajo tetë, prap nuk e ka të garantuar që i merr nënshkrimet e PDK-së”, deklaroi ai.
Hamza rikujtoi se Osmani është zgjedhur presidente me propozim të Lëvizjes Vetëvendosje dhe me mbështetjen e LDK-së. “Deri më datën 28 dhjetor ka bërë veprime të cilat i kanë shkuar në favor të LVV-së”, u shpreh ai.
Këto deklarata vijnë në kohën kur afati për zgjedhjen e presidentit po afrohet, ndërsa partitë politike ende nuk kanë dalë me qëndrime të qarta për kandidatët dhe mbështetjen e tyre.
