Aksioni policor kundër fajdes, i zhvilluar më 2 mars në disa qytete të vendit nga Prokuroria Themelore në Ferizaj, në koordinim me Drejtorinë për Hetimin e Krimeve të Rënda, kishte rezultuar me arrestimin e 15 personave të dyshuar për përfshirje në veprimtari kriminale. Në mesin e personave të arrestuar ishte edhe Kreshnik Dervishi – pronar i autosallonit “Royal”.
Gati tri vjet pas këtij aksioni, Kreshnik Dervishit i është ngritur aktakuzë nga prokurori Rasim Maloku, nën dyshimin e kryerjes së tri (3) veprave penale të fajdes.
Veriu.info ka siguruar aktakuzën e ngritur më 16 dhjetor 2025, ku emri i pronarit të autosallonit “Royal” është në mesin e emrave të tjerë të akuzuar për dhënie të fajdes.
Për çka akuzohet Kreshnik Dervishi?
Sipas aktakuzës, Kreshnik Dervishi dyshohet se më 18 mars 2022, në autosallonin “Royal”, ka kontraktuar shuma jo proporcionale të pasurisë, duke shfrytëzuar gjendjen e rëndë financiare të të dëmtuarit Samir Bajrami, që e kishte për shkak të obligimeve ndaj personave të tjerë për fajde.
Aty thuhet se Samir Bajrami është detyruar të blejë një “Porsche”, një “Audi Q8” dhe një “Mercedes” për çmim prej 230 mijë euro, të cilat vetura i ka shitur në të njëjtin autosallon për çmim prej 133 mijë euro, që të paguajë borxhin dhe shumën e parave të fajdes për të pandehurin S.S., duke pësuar dëm pasuror rreth 100 mijë euro.
Vepra e dytë, e cilësuar si fajde, me të cilën e ngarkon prokurori Rasim Maloku, ka ndodhur në vazhdimësi gjatë viteve 2020–2022, ku dyshohet se Kreshnik Dervishi ka shfrytëzuar gjendjen e rëndë financiare të të dëmtuarit Xhevdet Shala, që e kishte për shkak të fajdeve te personat e tjerë, duke i shitur disa vetura, të cilat ia ka blerë menjëherë me çmime dukshëm më të lira.
Aktakuza e ngritur më 16 dhjetor e ngarkon me një vepër penale të fajdes edhe më të rëndë, pasi që dyshohet se Kreshnik Dervishi e kishte detyruar të dëmtuarin të shes një hektar tokë në lagjen “Arbëria” (ish-Dragodan) të Prishtinës për borxhin që kishte ndaj tij.
Sipas aktakuzës, Kreshnik Dervishi, në autosallonin e tij “Royal”, kishte kontraktuar shuma jo proporcionale me të dëmtuarin F.K., i cili kishte obligime me fajde ndaj personave të tjerë dhe, për të dalë nga situata, është detyruar të marrë disa vetura nga pronari i autosallonit “Royal”, Kreshnik Dervishi.
Në pamundësi që t’ia paguajë borxhin e lidhur me kontraktim jo proporcional Kreshnik Dervishit, ky i fundit dyshohet se e ka detyruar nënën e të dëmtuarit, S.K., që të lidhë kontratë te noteri I.A. për shitjen e 1 hektari tokë ndërtimore në lagjen “Arbëria”, pronë e cila pastaj është bartur në emër të M.V., me të cilin e dëmtuara nuk ka pasur kurrfarë marrëveshjeje për shitblerje të pronës.
Ndryshe, Veriu.info kishte raportuar se të njëjtit të dëmtuar, F.K., dyshohet se pronari i autosallonit “Alberti”, Skender Bajrami, t’i ketë marrë tri banesa në emër të fajdes që ka rrjedhur nga një borxh prej 65 mijë euro.
LEXONI EDHE:
