Dikush për 26 vite shfrytëzoi dhe mori qira në objektin “4 shtyllat” në zemër të Prishtinës – pronë e CIK Kumanova, nga 2021 nën kompetencën e AKP-së

Shfrytëzimi i aseteve dhe objekteve të ndërmarrjeve shoqërore ka qenë dhe vazhdon të jetë një fenomen në vendin tonë, duke mundësuar pasurim të jashtëligjshëm për persona privat apo kompani private, e në anën tjetër duke shkaktuar dëm financiar për shtetin, përkatësisht Agjencinë Kosovare të Privatizimit që menaxhon me shumicën prej tyre.

Një rast i tillë është edhe një objekt afarist në zemër të Prishtinës, në sheshin “Nënë Tereza”, ku një lokal afarist me madhësi prej 65 metra katror ka qenë objekt i shfrytëzimit për 26 vite, ani pse objekti ka qenë në pronësi të ndërmarrjes shoqërore CIK Kumanova dhe para luftës njihej si “4 shtyllat”, raporton Gazeta Online Veriu.info.

Sipas një vendimi të AKP-së të vitit 2021 asetet e CIK Kumanova të Maqedonisë në territorin e Kosovës do të kalonin nën kompetencat administrative të agjencisë. Pastaj tek në vitin 2022 AKP filloi likuidimin e aseteve të kësaj ndërmarrje por fati i këtij objekti mbeti i panjohur pasi nga ajo kohë nuk ka informacione zyrtare se çfarë ndodhi me procesin e likudimit të lokalit afarist.

E kjo situatë ia ka mundësuar dikujt që të vazhdojë shfrytëzimin e tij, duke marrë qira të majme.

Kjo situatë ka vënë në pah konteste pronësore, ku një kompani me seli në Gjakovë “Ardita SHPK” pretendon pronësinë e objektit nga viti 1999 e deri më sot.

Kjo kompani i është drejtuar Dhomës së Posaçme të Gjykatës Supreme duke paditur AKP-në dhe duke kërkuar masë sigurimi me synimin t’i ndalohej AKP-së administrimi dhe dhënia me qira e lokalit.

Gjykata nxori aktvendim në janar të këtij viti duke refuzuar kërkesën e shoqërisë tregtare “Ardita SHPK”.

Gjykata konstatoi se: Marrëveshja e lidhur në Kumanovë nuk prodhon efekt juridik për pronë shoqërore në Kosovë, paditësi nuk ka bërë të besueshme të drejtën pronësore, prona figuron si pronë shoqërore dhe është nën menaxhimin e AKP-së, qiradhënia e aseteve të NSH-së bëhet vetëm përmes tenderimit publik.

Sipas Rregullores 04/2022, qiradhënia e aseteve të ndërmarrjeve shoqërore bëhet vetëm përmes tenderimit publik. Nuk ka evidencë që një procedurë e tillë është zhvilluar për këtë aset.

Pra ky objekt është shfrytëzuar për 26 vite dhe aty janë zhvilluar veprimtari biznesore.

Por ku kanë shkuar këto të hyra nga qiratë, pse shteti nuk ka ndërmarrë asnjë veprim, madje as sot nuk ka të dhëna se AKP  e ka dhënë me qira, por aty objekti po vazhdon të mbetet pezull.