Aksioni policor kundër fajdes, i zhvilluar më 2 mars në disa qytete të vendit nga Prokuroria Themelore në Ferizaj, në koordinim me Drejtorinë për Hetimin e Krimeve të Rënda, kishte rezultuar me arrestimin e 15 personave të dyshuar për përfshirje në veprimtari kriminale. Në mesin e personave të arrestuar ishin edhe Mujë Ademi, Ardi Saraqi e Ajvaz Muzaqi, ky i fundit pronar i autosallonit “Buna M” në Vushtrri.
Pak pa u bërë tri vite nga arrestimi, Prokuroria Themelore në Ferizaj u ka ngritur aktakuzë nën dyshimin për kryerjen e veprës penale të fajdes.
Veriu.info ka siguruar aktakuzën e ngritur më 15 dhjetor 2025, ku emri i pronarit të autosallonit “Buna M” dhe bashkëpunëtorëve të tij, Ardi Saraqi e Mujë Ademi, janë në mesin e shumë emrave të tjerë të akuzuar për dhënie të fajdes, shumica e të cilëve janë po ashtu pronarë të autosalloneve.
Për çka akuzohen Ajvaz Muzaqi e Ardi Saraqi?
Ajvaz Muzaqi e Ardi Saraqi dyshohet se kanë kontraktuar shuma joproporcionale të pasurisë në autosallonin “Buna M”, në dëm të të dëmtuarit Samir Bajrami, pronar i kompanisë “Ornela”.
Sipas aktakuzës, Samir Bajrami, për shkak të obligimeve që kishte ndaj personave të tjerë për fajde, ishte detyruar të blejë nga të pandehurit një veturë “Range Rover” për 50 mijë euro, të cilën ua ka shitur për 24 mijë euro; një veturë “Mercedes S Class” për 55 mijë euro dhe ua ka shitur të pandehurve për 28 mijë euro.
Po ashtu, nga të pandehurit dyshohet se ka blerë një “Mercedes ML” për 30 mijë euro dhe të njëjtën ua ka shitur për 16 mijë euro. Ky lloj “biznesi” mes tyre ka vazhduar edhe me blerjen e një “Mercedes E Class” për 36 mijë euro, të cilën ua ka shitur të njëjtëve për 17 mijë euro, duke pësuar në total një dëm pasuror prej 100 mijë euro.
Sipas prokurorit Rasim Maloku, me këto veprime Ajvaz Muzaqi e Ardi Saraqi dyshohet se kanë kryer veprën penale të fajdes.
Për çka akuzohen Ajvaz Muzaqi e Mujë Ademi?
Aktakuza e prokurorit Rasim Maloku e ngarkon Ajvaz Muzaqin edhe me një vepër tjetër, pasi që dyshohet se ka kryer veprën penale të detyrimit së bashku me të pandehurin Mujë Ademi.
Këta dy të pandehur akuzohen se, në fillim të vitit 2020, në Vushtrri, me qëllim të përfitimit të kundërligjshëm të dobisë pasurore për vete, me kanosje kanë detyruar Besim Gashin dhe Samir Bajramin që të paguajnë shuma parash në dëm të pasurisë së tyre, për shkak të parave që të pandehurit ua kishin dhënë me fajde.
Sipas aktakuzës, Ajvaz Muzaqi e Mujë Ademi i kanë kanosur seriozisht të dëmtuarit se do t’u shkaktonin ndonjë të keqe ose do t’i vrisnin, pasi që të dëmtuarit, për shkak të vështirësive financiare, nuk arrinin t’i kthenin me kohë shumat e parave në emër të fajdes.
Si pasojë e detyrimit nga të pandehurit, të dëmtuarit janë detyruar të marrin para me fajde tek persona të tjerë, me qëllim që t’i kryenin pagesat ndaj Ajvaz Muzaqit e Mujë Ademit, duke pësuar dëm pasuror në shuma nga 20 deri në 100 mijë euro.
Për çka akuzohet Mujë Ademi?
Aktakuza e prokurorisë e ngarkon me një vepër tjetër penale edhe Mujë Ademin, pasi që dyshohet se i ka dhënë para me fajde të dëmtuarit Besim Gashi, pronar i kompanisë “Blendi”.
Mujë Ademi dyshohet se, në fillim të vitit 2020, në Vushtrri, i ka dhënë 20 mijë euro me fajde Besim Gashit, me kamatë prej 2 mijë euro në muaj.
Sipas aktakuzës, i dëmtuari Besim Gashi, në pamundësi që t’i paguante me kohë borxhet, është detyruar të marrë vetura nga autosallonet me çmime më të larta, të cilat më pas është detyruar t’i shesë me çmime shumë më të ulëta, duke pësuar dëm pasuror në mijëra euro.
Ndryshe, me rastin e arrestimit të ndodhur me 2 mars 2023, Veriu.info kishte raportuar se Ajvaz Muzaqit i ishin sekuestruar: një Revole Sig Sauer me dy karikator me 15 fishek, një llaptop MacBook, dy telefonë, 14 dokumente të ndryshme dhe një veturë AUDI Q5.
LEXONI EDHE:
