Kompania Viva Fresh SHPK ka humbur rastin gjyqësor ndaj Gazetës Online Veriu.info edhe në Gjykatën e Apelit, pasi fillimisht kishte humbur këtë rast në shkallën e parë.
Gjykata e Apelit në Prishtinë ka nxjerrë aktgjykim sipas të cilit refuzohet në tërësi si e pabazuar padia e Viva Fresh Store ndaj Veriu.info me pretendimet për shpifje në një artikull të publikuar kohë më parë, si dhe përmes këtij aktgjykimi vërtetohet aktgjykimi i Gjykatës Themelore të Mitrovicës, pra shkallës së parë që kishte refuzuar këtë padi.
“Gjykata e shkallës së parë me aktgjykimin e atakuar të datës 24.11.2023 ka vendosur në këtë mënyrë: Refuzohet në tërësi kërkesëpadia e paditësit Viva Fresh SHPK, me të cilën ka kërkuar që të vërtetohet se e paditura Veriu.info SHPK, duke shpifur ka publikuar të dhënë të pavërteta për paditësen me të cilat e ka dëmtuar rëndë imazhin dhe reputacionin e paditësit dhe të detyrohet e paditura të ndalë shpifjen drejtuar ndaj paditëses dhe të premtoj se e njëjta nuk do të përsëritet dhe të detyrohet e paditura që paditëses në emër të kompensimit të dëmit moral të shkaktuar nga shpifja t’i paguajë paditëses shumën pre 2 mijë e 500 euro, me kamatë vjetore prej 8%, si e pabazuar.” – thuhet në arsyetimin e aktgjykimit të Gjykatës së Apelit.
Ky rast ka të bëjë artikullin “Dëshmi të reja për shkeljet që iu bëhen punëtorëve nga kompania Viva Fresh (FOTO)” të datës 04.04.2020, artikull ndaj të cilit Viva Fresh kishte humbur rastin edhe në Këshillin e Mediave të Shkruara, i cili e kishte refuzuar ankesën e paditëses Viva Fresh.
Pastaj kjo kompani humbi rastin në Gjykatë Themelore dhe së fundi në atë të Apelit.
Më aktgjykim të Gjykatës së Apelit vërtetohet përfundimisht se Veriu.info nuk ka bërë shpifje e as fyerje ndaj Viva Fresh SHPK.
Veriu.info u përfaqësua denjësisht në të drejtën e saj në tërë këtë proces nga avokatët e njohur, Kastriot Feka dhe Besim Parduzi, të cilët shquhen për profezionalizëm të lartë.
Më poshtë aktgjykimi i plotë:
