Një influencere është kritikuar ashpër pasi ka postuar skena të një dite të qetë në Dubai, në një kohë kur Emiratet e Bashkuara Arabe janë nën masa të shtuara sigurie për shkak të një vale sulmesh iraniane me raketa dhe dronë.
Influencerja, Jade Marrey 31-vjeçare që jeton midis Mbretërisë së Bashkuar dhe Dubait, e mbrojti veten kundër akuzave se po e minimizonte ashpërsinë e konfliktit, duke postuar skena të relaksuara në plazh.
Më herët këtë javë ajo shkroi: “Të gjithë janë në panik për Dubain… Jam ulur në Dubai Creek tani, fëmijët vrapojnë me familjet e tyre, njerëzit shijojnë kafe në diell ose ecin përgjatë ujit. Nuk ka asnjë dramë apo frikë fare”.
Ajo shtoi se Kite Beach ishte “plot me njerëz që jetojnë normalisht” dhe më vonë ndau një histori në Instagram nga shezlongu, së bashku me një libër dhe mbishkrimin: “Ka një atmosferë të mrekullueshme në plazh, të gjithë po kalojnë mirë dhe gjithçka është në rregull”.
Marrey sqaroi se jeton në Mbretërinë e Bashkuar, por e viziton qytetin në Emiratet e Bashkuara Arabe më shumë se katër herë në vit për diellin dhe stilin e jetës.
“Mos u qetëso, nuk e di çfarë të vjen”, “Kjo është budallallëk”, “Duket se nuk të lejohet të thuash se nuk është gjithçka mirë”, “Po, gjithçka është mirë derisa të të ndodhë diçka dhe qan”, janë vetëm disa nga komentet nën postim.
“Duke ndarë momente nga jeta e përditshme, nuk dua në asnjë mënyrë të zvogëloj seriozitetin e konfliktit. Por ka edhe një anë tjetër të historisë: këtu në Dubai, njerëzit ende shkojnë në punë, fëmijët luajnë në parqe dhe fqinjët përshëndeten me njëri-tjetrin si zakonisht”, tha ajo.
