Gazetari Adriatik Kelmendi ka theksuar se sipas interpretimit të dispozitave kushtetuese, sot (5 mars 2026) është dita e fundit kur Kuvendi i Kosovës mund të zgjedhë Presidentin e ri të vendit, përpara përfundimit të mandatit të Presidentit aktual.
Në një analizë të publikuar në Klankosova Kelmendi argumenton se në situatën aktuale zbatohet vetëm Neni 86 i Kushtetutës së Kosovës, pasi vendi nuk ndodhet në rast të ndërprerjes së mandatit presidencial apo në fillim të procedurës së zgjedhjes së Presidentit.
Sipas tij, Kosova aktualisht ka një President me mandat edhe për 30 ditë dhe Kushtetuta përcakton qartë se Presidenti i ri duhet të zgjidhet jo më vonë se 30 ditë para përfundimit të mandatit të Presidentit aktual.
Kelmendi thekson se nëse deri në orën 24:00 të datës 5 mars Kuvendi nuk arrin ta zgjedhë Presidentin, atëherë aktivizohet mekanizmi kushtetues zhbllokues: shpërndarja e Kuvendit dhe mbajtja e zgjedhjeve të reja brenda 45 ditësh.
Gazetari dhe autori i emisionit Rubikon nënvizon se në këtë rast nuk ka rëndësi nëse votohet për një apo më shumë kandidatë, nëse mbahet apo jo seancë e Kuvendit, apo nëse deputetët marrin pjesë në votim.
“Nëse deri në mesnatë nuk prodhohet President i ri, Kuvendi shpërndahet automatikisht dhe vendi shkon në zgjedhje të parakohshme”, theksoi Kelmendi.
Tutje, ai ka sqaruar gjithashtu se referimi i disa personave ndaj “afatit 60-ditor” është i gabuar në situatën aktuale.
Sipas tij, ky afat lidhet me Nenin 82 të Kushtetutës, që ka të bëjë me rastet kur procedura për zgjedhjen e Presidentit fillon më herët dhe nuk përfundon brenda 60 ditësh nga nisja e saj.
Ai argumenton se kjo dispozitë nuk mund të zbatohet më tani, pasi procedura për zgjedhjen e Presidentit nuk është nisur në kohën kur do të aktivizohej ky mekanizëm.
Sipas analizës së Kelmendit, Kuvendi aktual ka mundur ta nisë procedurën për zgjedhjen e Presidentit që në 11 shkurt 2026, ditën e konstituimit të tij, çka do të aktivizonte afatin 60-ditor.
Megjithatë, duke mos u ndërmarrë kjo procedurë në kohë, ai thotë se situata aktuale mbetet e rregulluar vetëm nga Neni 86 i Kushtetutës, që përcakton afatin e fundit për zgjedhjen e Presidentit.
Si rrjedhojë, sipas gazetarit Kelmendi, nëse deri në mesnatën e sotme Kuvendi nuk arrin të zgjedhë Presidentin e ri, “institucioni do të shpërndahet dhe zgjedhjet e reja duhet të mbahen brenda 45 ditësh”.
