Agjencia Qendrore e Prokurimit duket se duan ta zgjidhin çështjen e veturave. I kanë ndarë mbi 1,6 milion euro për pesë vetura të reja të modeleve ekskluzive.
Vlera e parashikuar e kontratës për pesë veturat që ka paraparë AQP’ja është mbi 1,7 milion euro, raporton Gazeta Insajderi.
Në dosjen e tenderit, AQP’ja ka bërë të ditur se po kërkon vetura të reja të pa përdorura me 00 kilometrazhë, prodhim jo më të vjetër sesa viti 2024.
Në kërkesën e parashtruar për operatorët ekonomikë konkurrues në dosjen e tenderit, kërkohet garanci tregtare sipas prodhuesit për pjesët mekanike, elektrike dhe pajisjet elektronike, minimumi 24 muaj ose për 100 mijë km të para.
Po ashtu, AQP’ja kërkon garancion për korruzion minimumi 10 vite dhe garancion për ngjyren nga prodhuesi, minimumi 24 muaj.
Për secilin model, AQP’ja ka shpallur fitues operatorë ekonomikë të ndryshëm. Në mesin e kompanive fituese janë edhe Mercom e Automita, dy kompani të cilat kanë marrë tenderë më herët lidhur me veturat qeveritare gjatë mandatit të Qeverisë Kurti.
Mercom Company ka fituar kontratën në vlerë prej 291 mijë eurosh, ndërkaq Automita 160 mijë sosh për një model dhe gati 550 mijë sosh për një model tjetër.
Përfitues të tenderit janë edhe Porsche Kosova, nga të cilët AQP’ja do ta blejë një model tjetër veture në vlerë prej gati 320 mijë eurosh.
AQP’ja para këtij tenderi kishte dhënë edhe gati 200 mijë euro për Mercom Company-n, pronar i së cilës është Arif Elshani, e i cili është i afërt me kryeministrin Albin Kurti.
AQP’ja ia kishte ndarë tenderin në formë të negociuar për biznesmenin Elshani, në vlerë prej 192 mijë eurosh, duke e mbytur konkurrencën.
Biznesmeni Elshani ka përfituar tendera të majmë përgjatë Qeverisë Kurti. Ai është parë duke realizuar takim të ngrohtë me kryeministrin në detyrë, Albin Kurtin, ku ky i fundit e vizitonte atë në biznesin e Elshanit.
Gazeta Insajderi kishte raportuar për një skandal në maj të këtij viti për një tender që iu kishte dhënë firmës së Elshanit nga Zyra e Kryeministrit. ZKM-ja e kishte kontraktuar firmën e Elshanit për t’ia marrë me qira 15 vetura, me çmim 550 euro në muaj për veturë.
Vet Zyra e Kryministrit, pasi që kishte shpallur tenderin dhe kishte marrë interesimet e kompanive, del që vendosi ti ndryshoi dy kritere krejt bazë, që lidhen me përformacën e veturave që po kërkonin.
Më 13 nëntor 2024 ishte shpallur tenderi.
Vetëm pesë ditë më vonë, më datën 18 nëntor të vitit të kaluar Zyra e Kryeministrit Albin Kurti, departamenti i tenderëve, krijon një dokument të ri, e që bën me dije se ka ndryshuar dy kritere, sipas tyre, për sqarim, pasi që ka marrë një pyetje nga një i interesuar për të ofertuar në këtë tender.
Një përgjigje për këtë interesim të një kompanie, që nuk ia përmendin emrin, kishte ardhur menjë herë, dy ditë pas shpalljes.
Isa Hajdari nga Zyra e Kryeministrisë e kishte nënshkruar këtë sqarim në lidhje me dosjen e këtij tenderi.
