Donika Gërvalla shfrytëzoi një intervistë te gazetari i preferuar i pushtetit, Blerim Haxhiaj, për t’i çuar mesazh edhe punonjësve të vet në Ministrinë e Drejtësisë.
“Do të kthehemi në brazdat e vjetra; pra, aty ku nën drejtimin e ish-ministres Haxhiu, gjërat kanë pasur rregull dhe ka pasur ligj”, tha ajo të hënën në një intervistë në RTK Prime, pasi u ankua se në disa departamente “minjtë nisën dasëm pasi iku macja”, duke iu referuar largimit të Haxhiut nga pozita disa muaj më parë.
Nga qëndrimet dhe paralajmërimet që i dha në intervistën me Haxhijajn, Gërvalla dëshmoi se tashmë është kthyer në “brazdat e vjetra”.
Ngjashëm sikurse ish-ministrja Haxhiu, e cila kishte suspenduar paligjshëm një përmbarues privat dhe ia kishte hequr – po ashtu pa igjshëm – licencën një tjetri, edhe Gërvalla paralajmëroi ndërhyrje në drejtësi në një rast ku tashmë ka vendim gjyqësor të formës së prerë.
Ajo e paragjykoi lëndën e përmbarimit të një borxhi prej mbi 700 mijë eurove që RTK-ja i detyrohet kompanisë “Grand Media” të moderatorit Enis Ujkani. Tha se përmbaruesi privat në këtë rast “nuk është i ri për komisionin disiplinor”.
“Prandaj nuk ka qenë edhe befasi”, tha ajo duke iu referuar procedurës së përmbarimit të borxhit të RTK-së nga “Grand Media”.
Gërvalla u pyet nga gazetari Haxhijaj për procesin e përmbarimit të borxhit të RTK-së në vlerë prej mbi 700 mijë eurove.
“Kemi një rast kur Gjykata e Apelit shumëfishon dënimin që duhet të paguajë kompania për produkte që nuk kanë qenë fare pjesë e një kontrate, dhe ndërkohë tani përmbaruesi do t’ia marrë paratë kompanisë tonë, RTK-së dhe nuk është një shumë e vogël. Bëhet fjalë për emisionin ‘Kush do të bëhet milioner’”, ia shpjegoi rastin Haxhijaj, Gërvallës.
“Përmbaruesi është i njëjti sikurse te rasti i Telekomit të Kosovës”, vazhdoi gazetari i afërt me pushtetin.
Gërvalla vërehej se ishte në dijeni për rastin. Tha se ka pranuar ankesë për këtë Radio Televizioni i Kosovës.
“Ju keni të drejtë për rastin konkret. Është e vërtetë që na ka ardhur një ankesë nga RTK-ja. Nga Zyra e juaj ligjore”, tha ajo.
“Po shfrytëzoj rastin ta bëjë me dije edhe publikisht që nuk ka mundësi përmbaruesi, qoftë me mbulesë ose pa mbulesë të gjyqtarit, të sillet në forma të paligjshme. Edhe përmbaruesi duhet t’u nënshtrohet të njëjtave ligje sikurse ne dy këtu”, kërcënoi ministrja e re e Drejtësisë.
Në fund të vitit të kaluar, Gjykata Komerciale e Kosovës-Dhoma e Shkallës së Dytë e ka detyruar Radio Televizionin e Kosovës (RTK) t`ia paguajë N.SH. “Grand Media” shumën prej 782,701.54 euro për shkak të shkëputjes së njëanshme të kontratës mbi emitimin televiziv të emisionit “Kush do të bëhet milioner?”.
