Dushan Maksimoviq, i akuzuar për sulmin terrorist në Banjskë të Zveçanit, ka pranuar se në telefonin e tij është gjetur numri i Milan Radoiçiqit, por ka theksuar se nuk ka pasur asnjëherë kontakt me të.
I pyetur nga anëtarja e trupit gjykues, Donikë Shala-Abdyli, lidhur me fotografitë që pretendon Prokuroria, Maksimoviq deklaroi se disa prej tyre nuk i ka parë kurrë dhe nuk e di se nga janë siguruar.
Ai shtoi gjithashtu se telefoni i tij është përdorur edhe pasi është marrë nga Policia.
Ndërkohë, anëtari i trupit gjykues, Rrahman Beqiri, e pyeti nëse e njeh Milan Radoiçiqin. Maksimoviq u përgjigj se nuk e njeh personalisht, por pranoi se e kishte numrin e tij në telefon.
Sipas tij, numri i Radoiçiqit ishte ruajtur pasi kishte planifikuar ta kontaktonte për ndihmë familjare, por këmbënguli se nuk ka pasur asnjë komunikim me të.
“Kurrë s’kam pas kontakt me të”, deklaroi ai.
