Ish-nënkryetari i LDK-së dhe ish-kreu i Degës së LDK-së në Podujevë, Agim Veliu, ka dërguar një mesazh për anëtarët, aktivistët dhe kontribuesit e partisë me rastin e 36-vjetorit të themelimit të Degës së LDK-së në Podujevë.
Në reagimin e tij, Veliu ka përkujtuar historinë dhe rëndësinë e degës së Podujevës si një nga bastionet më të forta të LDK-së dhe si pjesë e projektit më të madh politik dhe kombëtar në historinë e Kosovës, që bashkoi qytetarët rreth idealeve të lirisë, demokracisë dhe shtetndërtimit.
Megjithatë, ai ka vlerësuar se realiteti aktual është ndryshe.
Ai ka theksuar nevojën për rikthim te vlerave, bashkim të sinqertë dhe qasje që rikthen besimin e humbur të qytetarëve.
Postimi i plotë:
Me rastin e 36-vjetorit të themelimit të Degës së LDK-së në Podujevë, si drejtues shumëvjeçar, ndjej obligim moral t’u drejtohem të gjithë qëndrestarëve, anëtarëve, aktivistëve dhe kontribuesve që për dekada e kanë ndërtuar dhe mbajtur gjallë këtë degë.
LDK-ja ishte dhe mbetet një nga projektet më të rëndësishme politike dhe kombëtare në historinë tonë – një lëvizje që bashkoi qytetarët rreth idealeve të lirisë, demokracisë dhe shtetndërtimit.
Dega e Podujevës ka qenë gjithmonë ndër bastionet më të forta të kësaj fryme.
Por sot, për fat të keq, realiteti është krejt tjetër.
Nga një bastion i pathyeshëm, kjo degë është shndërruar në një strukturë humbëse, e që nuk është rastësi, por pasojë e qartë e një udhëheqjeje që ka humbur lidhjen me bazën, që ka përçarë strukturat dhe ka zëvendësuar vlerat me interesa të ngushta.
LDK-ja në Podujevë ka nevojë për rikthim te vlerat, për bashkim të sinqertë dhe për një qasje që e rikthen besimin e humbur të qytetarëve.
Respekti për të kaluarën tonë na obligon të mos lejojmë rrënimin e mëtutjeshëm.
Urime të gjithëve!
