Aksioni i policisë, në bashkëpunim me Inspektoratin Shëndetësor, për identifikimin e klinikave dhe qendrave estetike që injektojnë fillerë dhe botox pa licencë, kishte rezultuar me zbulimin edhe të një klinike stomatologjike që ‘ombrellën’ e vet e shfrytëzonte për aplikim ilegal te klientët të këtyre dy produkteve.
Veriu.info ka siguruar një vendim të Inspektoratit Shëndetësor, me të cilin klinika stomatologjike “Dr. Jahja”, me themeluese Jeta Jahja, është gjobitur me 3 mijë euro për shkelje të Ligjit për Shëndetësi, pasi që është zbuluar se në klinikën e saj bëhen injektime të botox-it dhe fillerëve pa licencë.
Në raportin e inspektimit të inspektorëve shëndetësorë, që mban datën 29 dhjetor 2025, thuhet se qëllimi i inspektimit ka qenë verifikimi i ofrimit të shërbimeve shëndetësore si filler dhe botox.
“Në kohën e inspektimit u gjetën sasi të fillerëve dhe botox-it; produktet e gjetura të fillerëve, sipas themelueses Dr. Jeta Jahja, janë blerë nga ‘Neauvea’, ndërsa për botox-in nuk na është ofruar asnjë faturë, të cilat u konfiskuan nga Inspektorati Farmaceutik”, thuhet në raportin e inspektimit të siguruar nga Veriu.info.
Në raport bëhet e ditur se është kontrolluar regjistri i pacientëve dhe ishin të evidentuar pacientët që i kanë marrë këto shërbime.
Inspektorët shëndetësorë, gjatë këtij aksioni, kanë marrë fakte nëpërmjet fotove dhe kopje të dokumentacionit të regjistrit të pacientëve, të cilët kanë marrë trajtime estetike në këtë institucion shëndetësor.
“Botoxi në Kosovë hyn ilegalisht; nuk ka asnjë kompani që është e licencuar për import të Botox-it, andaj edhe është i rrezikshëm, sepse nuk dihet prejardhja dhe mënyra e transportit”, thuhet në raport, duke sqaruar se nga Inspektorati Farmaceutik janë konfiskuar sasia që është gjetur në klinikën “Dr. Jahja” e fillerëve dhe Botox-it.
Me procesverbal të inspektimit dhe raport të inspektimit, klinikës “Dr. Jahja”, me themeluese Jeta Jahja, i është ndaluar ofrimi i shërbimeve shëndetësore për fillerë dhe botox.
Jeta Jahja edhe pse injektonte fillerë pa licencë, ajo nuk ka hezituar që ofrimin e këtyre shërbimeve t’i bëjë edhe mediale, por që çuditërisht nuk është pyetur se a ka licencë për ofrimin e tyre.
Ndryshe, te Jeta Jahja shërbime stomatologjike kanë marrë shumë persona të famshëm, përfshirë edhe ministren Donika Gërvalla.
Veriu.info ka tentuar të marrë një qëndrim nga “Dr. Jahja” për çështjet e ngritura, por deri në momentin e publikimit të artikullit nuk kemi pranuar përgjigje në pyetjet e dërguara.
Çka është mbushja me acid hialuronik (filler)?
“Mbushja me acid hialuronik” është një procedurë estetike (jo kirurgjikale), ku në lëkurë injektohet acid hialuronik, një substancë që gjendet natyrshëm në trup dhe ndihmon në mbajtjen e lagështisë dhe volumit.
Mjeku ose profesionisti injekton këtë substancë në zona të caktuara të fytyrës ose trupit për të mbushur rrudhat, për të rritur volumin (p.sh. buzët, faqet), për të përmirësuar konturet e fytyrës dhe për të hidratuar thellësisht lëkurën.
Foto ilustrim: Aplikimi i fillerit
Acidi hialuronik ka aftësi të tërheqë dhe të mbajë ujë, kështu që e bën lëkurën më të plotë dhe më të lëmuar, si dhe jep efekt të menjëhershëm.
Efekti i acidit hialuronik zgjat 6 deri në 18 muaj.
Rreziqet e acidit hialuronik, nëse aplikohet nga persona të palicencuar, janë: ënjtje, mavijosje, infeksion, deformim ose rezultate jo natyrale dhe, në raste të rralla, bllokim i enëve të gjakut.
Çka është aplikimi (injektimi) i botox-it?
Aplikimi i botox-it është një procedurë estetike ku injektohet një dozë e vogël e toksinës botulinike në muskuj të caktuar të fytyrës (ose trupit), për t’i relaksuar ata përkohësisht.
Aplikimi i botox-it kryhet me gjilpëra shumë të holla dhe injektohet në muskuj specifikë, si në: ballë, mes vetullave dhe rreth syve.
Kur aplikimi i botox-it bëhet nga persona të palicencuar, atëherë paraqiten këto rreziqe estetike dhe shëndetësore.
Rreziqet estetike: rënie e qepallës (sy “i varur”), asimetri në fytyrë, fytyrë “e ngrirë” (pa mimikë natyrale) dhe rezultate të panatyrshme.
Rreziqet mjekësore: dozë e gabuar (paralizim i tepërt i muskujve), injektim në vend të gabuar (dëmtim i nervave), infeksione dhe reaksione alergjike.
Por, në raste më të rralla paraqiten edhe këto rreziqe: vështirësi në të folur ose gëlltitje, probleme me frymëmarrjen (nëse toksina përhapet gabim) dhe përhapje e efektit në zona të tjera të trupit.
LEXONI EDHE:
