Analisti Shenoll Muharremi ka kiritikuar ashpër përbërjen e re të kryesisë së LDK-së të emëruar nga Lumir Abdixhiku.
Ai ka thënë se vetëm 6 gra u emëruan në kryesi nga 35 anëtarë, ani pse sipas tij gratë e kanë mbajtur gjallë këtë parti periudhën e fundit, raporton Gazeta Online Veriu.info.
“Ky mund të jetë edhe një ndër gabimet strukturore të LDK-së dhe një nga arsyet e rënies në 13%.” – thekson ai.
Madje ai ka theksuar mospërfshirjen e deputetes Janina Ymerit në kryesi.
Postimi i plotë:
Doli lista e re e kryesisë së LDK-së me vetëm 17% gra
Si dihet, kryesisht gratë me aktivizëm dinamik e kanë mbajtur gjallë këtë parti periudhën e fundit. Hykmete, Jehona, Janina…
Kur e shikon këtë listë të re të kryesisë, nga 35 anëtarë të kryesisë që u publikuan, janë vetëm 6 gra. Kjo i bie rreth 17%, pra as 20% nuk janë gra. Ndërsa burra janë 83%. Diçka këtu nuk duket në rregull. Sidomos kur dihet gjithashtu që elektoralisht janë rreth 100,000 gra si votuese potenciale që nuk ndihen të përfaqësuara dhe nuk votojnë në zgjedhje.
Pra edhe nga aspekti i rezultateve konkrete por edhe politikisht dhe elektoralisht është gabim. Si munden gratë, por edhe partia, me arritë suksese kur nuk u ipet as rasti? E pastaj është gjithashtu meritokracia dhe mundësitë e barabarta si koncepte thelbësore të frymës kushtetuese të Kosovës.
Por edhe përfaqësimi rajonal dhe lokal duket se lista kishte telashe. Një kryesi shumë e fokusuar në Prishtinë. Po rajonet, qytetet dhe fshatrat e tjera të Kosovës?
Ky mund të jetë edhe një ndër gabimet strukturore të LDK-së dhe një nga arsyet e rënies në 13%.
Fenomene të tilla janë paraqitur gjithashtu edhe në listën zgjedhore të kësaj partie.
Pastaj, edhe zëri i saj më i theksuar dhe i dashur për publikun kosovar kohën e fundit, deputetja Janina Ymeri, nuk është fare në listë.
