Kuvendi i Kosovës e ka miratuar në parim projektligjin për Byronë Shtetërore për Verifikimin dhe Konfiskimin e Pasurisë së Pajustifikueshme.
Me 81 vota “për, 25“abstenime” dhe asnjë kundër është miratuar projektligji, të cilin një herë Gjykata Kushtetuese ia kishte rrëzuar Qeverisë Kurti II.
Përveç VV-së, pro këtij projektligji ka votuar edhe LDK dhe AA, kurse PDK ka abstenuar.
Ministrja e Drejtësisë, Donika Gërvalla, e ka prezantuar përmbajtjen e projektligjit para deputetëve.
Ajo ka thënë se ky dokument është hartuar për llogaridhënie.
“Ky projektligj nuk është i zakonshëm, është projektligj që thotë qartë se funksioni publik, nuk mund të jetë mburojë për pasurim të pajustifikueshëm. Kur ushtron funksion publik, askush nuk duhet të jetë mbi detyrimin për ta arsyetuar pasurinë e vet. Është mesazh i qartë se shteti nuk mjaftohet me deklarime kundër-korrupsionit, por ndërton mekanizma realë e funksionalë. Nuk i shërben ndonjë spektakli, por rezultateve konkrete. Nuk është shkruar për të prodhuar tituj, por llogaridhënie”, tha ajo.
Vërejtje ndaj këtij projektligji ka dhënë deputeti i PDK-së, Përparim Gruda.
Në adresimin e tij, ai ka kërkuar që ky projektligj të përmirësohet në mes të dy leximeve.
“Nëse ne i japim shancë Kuvedit që në mes të dy leximeve të organizojë dëgjim publik legjislativ, ne mund t`i adresojmë të gjitha vërejtjet e Gjykatës Kushtetuese dhe të kalojmë bashkë këtë ligj. Para se me ndodh këto PDK-ja do të abstenojë për me i dhënë një shancë që ne mes dy leximeve me e përmirësuar ligjin, me e sjell në përputhje me Kushtetutën, me standardet e Komisionit t Venecias dhe në lexim të dytë me e ratifiku ashtu siç duhet. Nëse vërejtjet nuk adresohet, ne nuk mund të kalojmë këtë ligj, sepse unë jam i bindur që këto dispozita që i përmenda dhe plotë të tjera janë në shpërputhje me Kushtetutën”, ka thënë ai.
Kurse në emër të LDK-së ka folur deputetja Doarsa Kica-Xhelili.
Ajo ka bërë me dije se këtë projektligji fillimisht e ka inicuar LDK.
“LDK në parim voton pro Byrosë. Por deri në lexim të dytë duhet të punohet për t’i shmangur gabimet eventuale që mund të dëmtojnë qytetarët që kanë përfituar nga remitencat nga diaspora. Byroja mund të bëhet. Dhe duhet të kuptojmë nëse qëllimi i kësaj Qeveria është lufta kundër korrupsionit apo është vetëm krijimi i përshtypjes së luftës kundër korrupsionit. Dhe kjo do të kuptohet më së miri pasi të votohet në parim”, ka deklaruar Kica-Xhelili.
Edhe shefi i Grupit Parlamentar të AAK-së, Besnik Tahiri, ka thënë se partia e tij do ta përkrahë projektligjin për Byronë për Pasurinë e Pajustifikueshme.
“Komisionin për legjislacion ne kemi votuar për, edhe sot do të votojmë për, për shkak se mendojmë që një institucion si ky i cili ka probleme serioze që do t’i diskutoj, kishte me qenë mirë me hy në fuqi për të parë se cili është kontributi i këtij institucioni në forcimin e luftës kundër korrupsionit dhe të njëjtën kohë në hetimin e secilit prej nesh në pasurinë që e kemi. Rrjedhimisht, konfiskimin e tyre dhe kthimin te qytetari dhe shteti. Kush nuk mundet me justifiku edhe 1 cent si zyrtar publik do duhej të ballafaqohet me forcën e ligjit”, është shprehur Tahiri.
