Një 25-vjeçar nga Mitrovica pretendon se është rrëmbyer, rrahur dhe kërcënuar nga ish-punëdhënësit e tij, pas ndërprerjes së marrëdhënies së punës.
Eroll Deliqi thotë se kishte punuar për rreth pesë vjet në kompaninë “Beha Trans”. Sipas tij, më 19 shkurt kishte dalë për të diskutuar për kthimin e një borxhi prej 300 eurosh, por pretendon se është marrë me veturë dhe është dërguar në objektin e kompanisë në Kçiq, ku është mbajtur i mbyllur për rreth tri orë.
Ai deklaron se gjatë kësaj kohe është rrahur dhe kërcënuar nga pronarët e kompanisë, Orhan dhe Behram Sahiti. Sipas tij, është kërcënuar që të vazhdojë punën dhe pretendon se në një moment është tentuar të sulmohet edhe me një shufër metalike.
25-vjeçari thotë se, për t’u liruar, është detyruar të nënshkruajë një kontratë të shkruar me dorë për të vazhduar punën me pagë prej 1000 eurosh.
Ai deklaron se disa ditë pas ngjarjes, njëri nga vëllezërit i ka shkuar te shtëpia dhe i ka kërkuar 1300 euro, duke e kërcënuar. Sipas tij, kërcënimet kanë vazhduar edhe në raste të tjera, përfshirë përndjekje dhe kërcënime për thyerje gjymtyrësh.
Deliqi thotë se rastin e ka raportuar në Polici disa herë dhe se borxhin prej 300 eurosh e pranon, por kundërshton shumën prej 1300 eurosh që pretendon se po i kërkohet.
Policia e Kosovës ka konfirmuar se rasti është raportuar dhe është cilësuar si “lëndim i lehtë trupor”, ndërsa ka bërë të ditur se hetimet janë në zhvillim.
Pronarët e kompanisë “Beha Trans” kanë mohuar akuzat, duke pretenduar se rasti është i inskenuar. Një roje e kompanisë ka deklaruar se 25-vjeçari është sjellë në objekt atë natë, por se nuk ka parë apo dëgjuar se është rrahur nga dikush aty.
Ndërkohë, Brikena Hoxha nga Iniciativa Kosovare për Stabilitet (IKS) bëri thirrje që rastet e dhunës, kërcënimeve dhe detyrimit në vendin e punës të raportohen në institucionet përkatëse, përfshirë Policinë, Prokurorinë dhe Inspektoratin e Punës.
