Në Gjykatën Themelore në Prishtinë këtë të hënë në Gjykatën Themelore në Prishtinë në rastin ndaj Gani Demaj së bashku me Jahja Llukën të po akuzohen për korrupsion u dëgjua dëshmitari Hekuran Selimaj, pronar i kompanisë “Elsa Grup”.
Dëshmitari Selimaj deklaroi se për projektin për rregullimin e varrezave të dëshmorëve u angazhua me ftesën e zyrtarit Jahja Lluka dhe po ashtu ishte projekti i vetëm që kishte bashkëpunuar me të.
Pas pyetjes së prokurorit të shtetit se a kishte nënshkruar kontratë, dëshmitari Selimaj deklaroi se “jo vetëm është bërë me mirëbesim, e kemi punuar me referenca të kompanisë së mëhershme”.
Dëshmitari Selimaj deklaroi se nga të gjitha pagesat për varrezat e dëshmorëve një apo dy pagesa nuk janë kryer. Dëshmitari Selimaj deklaroi se nuk e dinte ku i kishte dorëzuar faturat e kompanisë, në Presidencë apo në Kryeministri, ngase ato i kishte dorëzuar departamenti i financave të kompanisë së tij.
Dëshmitari Selimaj deklaroi se për punët shtesë nuk e kishte faturuar plotësisht Kryeministrin, duke respektuar çmimet referuese, ai deklaroi se koha ambulative ishte paguar nga ana e kompanisë e jo nga Kryeministria. Gjithashtu, dëshmitari Selimaj deklaroi se i kishte stimuluar edhe punëtorët për punën e dhënë.
Dëshmitari Selimaj deklaroi se nuk është paguar nga Qeveria asnjëherë për dëmtimet financiare që i kanë shkaktuar kompanisë së tij. Dëshmitari shpjegoi se nuk janë paguar asnjëherë nga Qeveria për këto kosto, pasi kanë qenë të detyruar të marrin me qira autovinçat për shkak të peshës së madhe të pllakave mbi 1.5 ton, të cilat nuk mund të lëviznin me dorë.
Dëshmitari deklaroi se të gjitha punët janë bërë nën çmimin standard të kompanisë. Dëshmitari Selimaj tha se nuk e njihte të akuzuarin Gani Demaj, por vetëm si figurë.
Prokurori Bashkim Zeqaj e pyeti dëshmitarin Hekuran Selimaj nëse kishte pasur projekt për punën. Dëshmitari Hekuran Selimaj tha se nuk ka pasur projekt zyrtar, por vetëm një imitim të thjeshtë. Kompania e tij e ka punuar me standard më të lartë.
Ai shtoi se nuk është dorëzuar ndonjë raport përfundimtar në institucione, por vetëm një raport i brendshëm brenda kompanisë.
Në mungesë të ekspertit Shaip Bytyqi, seanca e paraparë për ditën e sotme u shty për një ditë tjetër.
Sipas aktakuzës, Jahja Lluka si person zyrtar, duke shfrytëzuar pozitën e këshilltarit politik të kryeministrit të Republikës së Kosovës, Ramush Haradinaj, ka tejkaluar kompetencat me rastin e angazhimit të drejtpërdrejtë të kompanisë “NTP Art Com” me pronar Hekuran Selimaj, për kryerjen e punëve të varrezave të dëshmorëve dhe heronjve: Ahmet Krasniqi, Qazim Jakupi, Ilir Konushevci, Hazir Malaj dhe Adem Demaçi, ku kompanisë së lartcekur i mundësohet përfitimi në mënyrë të kundërligjshme dhe me qëllim shkaktimin e dëmit në buxhetin e Qeverisë.
Krejt kjo, sipas aktakuzës, duke shpërfillur procedurat e prokurimit e duke ia mohuar të drejtën e konkurrimit kompanive të tjera, duke punuar pa projekt, pa menaxher të punimeve apo komision për vlerësimin e punëve të kryera, në kundërshtim me Ligjin për Prokurimin Publik – pa procedura të tenderimit, Ligjin për Menaxhimin e Financave Publike – për kryerjen e pagesave, Rregulloren për Shpenzimin e Parasë Publike, Rregulloren për Fushat e Përgjegjësisë Administrative të Zyrës së Kryeministrit dhe Ministrave – ku janë të përcaktuara detyrat dhe përgjegjësitë e këshilltarëve politikë, përkatësisht përcaktohet se atyre nuk u lejohet të ndërhyjnë në funksione që janë të përcaktuara me ligjin për shërbimin civil. Me këtë rast, buxhetit të Republikës së Kosovës i shkakton dëm në vlerën prej 92 mijë e 827 euro e 61 centë.
Për këto veprime, Lluka ngarkohet me veprën penale “Keqpërdorimi i pozitës apo autoritetit zyrtar” nga neni 422, paragrafi 2 lidhur me nenin 81 të Kodit Penal të Republikës së Kosovës (KPRK).
Kurse, në pikën dy të aktakuzës, Gani Demaj akuzohet se si person zyrtar – shef i kabinetit të Kryeministrit të Republikës së Kosovës, Ramush Haradinaj, ka tejkaluar kompetencat e tij me qëllim për t’i shkaktuar dëm Qeverisë, duke nënshkruar faturë të datës 30 korrik 2018 për punimet në varrin e Adem Demaçit, e cila faturë është ekzekutuar përmes përmbaruesit privat për heronjtë: Ahmet Krasniqi, Qazim Jakupi, Ilir Konushevci, Hazir Malaj, ku është punuar pa projekt, pa menaxher të projektit apo komision për vlerësimin e punimeve të kryera dhe pa raport për përcjelljen e punimeve.
Të gjitha këto, aktakuza thotë se u bënë në kundërshtim me Ligjin për Prokurimin Publik – pa procedura të tenderimit, Ligjin për Menaxhimin e Financave Publike – për kryerjen e pagesave, Rregulloren për Shpenzimin e Parasë Publike, Rregulloren për Fushat e Përgjegjësisë Administrative të Zyrës së Kryeministrit – ku janë të përcaktuara detyrat dhe përgjegjësitë e këshilltarëve politikë. Kështu, buxheti i shtetit i shkaktohet dëm në vlerën prej 92 mijë e 827 euro e 61 centë.
Për këto veprime, Gani Demaj ngarkohet me veprën penale “Keqpërdorimi i pozitës apo autoritetit zyrtar” nga neni 422, paragrafi 2 lidhur me nenin 81 të KPRK-së. /BetimipërDrejtësi
Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.
