Kryeministri i Kosovës, Albin Kurti, ka bërë një deklaratë të re lidhur me zhvillimet për zgjedhjen e presidentit, duke përmendur edhe kandidaten Hatixhe Hoxha.
Kurti tha se lista e Lidhja Demokratike e Kosovës nuk ka pasur emër konkret, pavarësisht nënshkrimeve të mbledhura.
“Lista e LDK-së nuk kishte emër se për kë janë nënshkrimet,” deklaroi ai, transmeton Indeksonline
Sipas tij, ka pasur komunikim të drejtpërdrejtë me kandidaten Hatixhe Hoxha, me të cilën ka diskutuar mundësinë e tërheqjes nga gara.
“Unë kam komunikuar me kandidaten Hatixhe Hoxha dhe kam biseduar me të. Ajo është dakorduar që të tërhiqet nga kandidatura nëse LDK i sjell 15 nënshkrimet e saj për këdo që është,” u shpreh Kurti.
Kjo deklaratë vjen në një moment kyç, teksa afati për zgjedhjen e presidentit po afrohet dhe partitë politike vijojnë përpjekjet për të arritur një marrëveshje dhe për të siguruar kuorumin në Kuvend.
