Ambasadori i Republikës së Kosovës në Vatikan, Vehbi Miftari, ka reaguar pas shkarkimit nga detyra.
Në një postim në Facebook, Miftari ka deklaruar se u lirua nga detyra nga ushtruesja e detyrës së presidentes, Albulena Haxhiu, duke thënë se ka qenë nder jetësor të jetë i pari shef i misionit në Selinë e Shenjtë.
“Tani kur po përgatitem t’ia dorëzoj detyrën pasardhësit a pasardhëses sime, ofroj gjithë gatishmërinë time që, në përputhje me dinjitetin tim e me lartësinë e pozitës që kam mbajtur, të siguroj që vendimet tona të mos lëndojnë raportet e krijuara me aq mund” shkroi Miftari.
Ai tha se ky vendim nuk shënon përfundimin e angazhimit të tij për Republikën.
“Me përvujtëni…” shkroi Miftari.
Ky është postimi i plotë i tij:
Të dashur qytetarë të Republikës së Kosovës!
Ju njoftoj se këto ditë kam pranuar dekretin e U.D. Presidentes Haxhiu për lirim nga detyra e shefit të Misionit në Selinë e Shenjtë.
Ky dekret shënon përfundimin e mandatit tim në Vatikan. Sigurisht, jo angazhimin tim për Republikën, së cilës i kam shërbyer çdo herë me përkushtim, pa kërkuar kurrë shpagim.
Ka qenë nderi jetësor që më është bërë, duke qenë i pari shef i Misionit në Vatikan.
Sot, kthehem i lumtur që jo vetëm misioni, por edhe marrëdhëniet janë të konsoliduara plotësisht.
Falënderoj Presidenten Osmani për besimin, secilin prej jush për përkrahjen dhe Selinë e Shenjtë për dashurinë me të cilën më mirëpriti e më ofroi bashkëpunim.
Kanë qenë dy vjet plot angazhim e sfida të njëpasnjëshme, ndonjëherë të pakuptimta, me më shumë a më pak përkrahje, por të bukura e frytdhënëse, gjithsesi.
Tani kur po përgatitem t’ia dorëzoj detyrën pasardhësit a pasardhëses sime, ofroj gjithë gatishmërinë time që, në përputhje me dinjitetin tim e me lartësinë e pozitës që kam mbajtur, të siguroj që vendimet tona të mos lëndojnë raportet e krijuara me aq mund.
Me përvujtëni,
Vehbi Miftari
