Sot është mbajtur seanca për caktimin e masës së paraburgimit për tre zyrtarë policorë të arrestuar dje nën dyshimin për keqpërdorim të pozitës apo autoritetit zyrtar, shkelje të fshehtësisë së procedurës dhe marrje të deklaratave me anë të shtrëngimit.
Veriu.info ka siguruar aktvendimin me të cilin gjykata i ka liruar zyrtarët policorë Alfred Ismajli, Artan Shala dhe Bion Beqiri në procedurë të rregullt, duke mos miratuar kërkesën për caktimin e masës së paraburgimit prej 30 ditësh.
Tre të pandehurve u është caktuar masa e ndalimit për t’iu ofruar vendit apo personit të caktuar, me çka Alfred Ismajli, Artan Shala dhe Bion Beqiri obligohen që në largësi prej 100 metrash të mos u ofrohen vendeve të punës, përveç ditëve kur duhet të lajmërohen.
Veriu.info ka parë aktvendimin e gjykatës, ku thuhet se të tre zyrtarët policor të pandehur janë të obliguar të paraqiten çdo të hënë në ora 09:00 në Stacionin Policor Qendra në Prishtinë.
Sipas aktvendimit të gjykatës, të pandehurit dyshohen se kanë kryer veprat penale të keqpërdorimit të pozitës apo autoritetit zyrtar, shkeljes së fshehtësisë së procedurës dhe marrjes së deklaratave me anë të shtrëngimit.
Në arsyetimin e aktvendimit të gjykatës thuhet se pas dëgjimit të palëve në procedurë dhe pas analizimit të shkresave të lëndës, është gjetur se kërkesa e Prokurorisë Themelore në Prishtinë për caktimin e masës së paraburgimit është e pabazuar dhe ndaj tyre është vendosur të caktohet masa e ndalimit për t’iu ofruar vendit apo personit të caktuar, si dhe masa e paraqitjes në stacion policor.
Në aktvendimin e gjykatës thuhet se ekziston dyshim i bazuar se, në vazhdimësi në Prishtinë, i dyshuari, zyrtari policor Alfred Ismajli, duke keqpërdorur detyrën apo autoritetin zyrtar, i ka tejkaluar kompetencat e tij, pasi që nga data 12.03.2024 deri më datë 21.01.2026 është koordinuar me të dyshuarin Mihajlo Milovanoviç që të ndihmojë me qëllim që i njëjti të tjetërsojë parcelën me numër të ngastrës kadastrale 1662-0 me sipërfaqe prej 5976 m² me anë të dokumenteve të falsifikuara dhe atë ta bartë te personi Zeljko Jagodiç.
Për të pandehurin Artan Shala thuhet se ekziston dyshimi i bazuar se në Prishtinë, duke keqpërdorur detyrën apo autoritetin zyrtar, i ka tejkaluar kompetencat e tij, pasi që i ka siguruar certifikatat e pronave publike e që më pas Mihajlo Milovanoviç për të njëjtat prona të falsifikonte dokumentet dhe më pas ato prona t’i paraqiste sikur janë me dokumente të rregullta dhe të njëjtat të shiten me qëllim që të përfitojnë në mënyrë të kundërligjshme nga shitja e tyre.
Ndërkaq, për të pandehurin Bion Beqiri thuhet se ekziston dyshimi i bazuar se në Prishtinë, në Stacionin Policor Jugu, duke keqpërdorur detyrën apo autorizimet e tij, ka vepruar sipas udhëzimeve të zyrtarit policor të dyshuar Alfred Ismajli, duke qenë së bashku me të në trajtimin e rastit që ndërlidhet me parcelën me numër të ngastrës kadastrale 1662-0 me sipërfaqe prej 5976 m², edhe pse Alfredi nuk ishte në Sektorin e Hetimeve, dhe e ka lejuar të njëjtin që të qëndrojë në intervistimin e dëshmitares V. Beqiri pa u evidentuar në procesverbal, pasi që e dinte se një gjë e tillë nuk është e lejuar.
Aktvendimi i plotë i gjykatës:
