Lionel Messi dhe Cristiano Ronaldo mund ta mbyllin rivalitetin më të madh në historinë e futbollit me një finale të paharrueshme të Kupës së Botës 2026, pasi rruga e turneut u jep mundësinë të takohen vetëm në ndeshjen për trofe.
Finalja e ëndrrave bëhet e mundur
Dy legjendat e futbollit kanë dominuar sportin për më shumë se dy dekada, duke fituar së bashku 13 “Topa të Artë” dhe duke ushqyer vazhdimisht debatin se kush është futbollisti më i madh i të gjitha kohërave.
Tashmë, pas përfundimit të fazës së grupeve, është krijuar skenari ideal që Messi dhe Ronaldo të përballen për herë të parë në histori në një ndeshje të Kupës së Botës – dhe atë vetëm në finale, më 19 korrik në stadiumin MetLife të New Jersey.
Rrugët e tyre drejt finales
Argjentina e mbylli Grupin J me tri fitore në po aq ndeshje, pasi mposhti Jordaninë 3-1. Messi, i cili hyri nga stoli, shënoi për të shtatën ndeshje radhazi në këtë Botëror dhe vazhdon të zgjerojë rekordin si golashënuesi më i mirë në historinë e Kupës së Botës.
Kampionët në fuqi do të përballen me Cape Verden në fazën e 1/16-ave. Nëse kualifikohen, i presin Egjipti ose Australia, ndërsa në çerekfinale mund të ndeshen me Zvicrën, Algjerinë, Kolumbinë ose Ganën. Një gjysmëfinale e mundshme ndaj Brazilit ose Anglisë do të ishte testi më i madh para finales.
Nga ana tjetër, Portugalia e mbylli Grupin K në vendin e dytë pas barazimit 0-0 me Kolumbinë dhe do të përballet fillimisht me Kroacinë. Nëse kalon më tej, mund të ndeshet me Spanjën, ndërsa më pas me një nga SHBA-ja, Bosnja dhe Hercegovina, Belgjika ose Senegali.
Fakti që Portugalia nuk e fitoi grupin bëri që Messi dhe Ronaldo të vendosen në anë të kundërta të tabelës, duke eliminuar mundësinë e një përballjeje para finales.
Një kapitull historik mund të mbyllet
Messi dhe Ronaldo janë përballur plot 36 herë gjatë karrierës, kryesisht në ndeshjet legjendare mes Barcelonës dhe Real Madridit. Argjentinasi numëron 16 fitore, ndërsa portugezi 11.
Megjithatë, ata nuk janë përballur kurrë në një ndeshje të Kupës së Botës. Nëse të dyja kombëtaret arrijnë deri në fund, finalja e 19 korrikut do të jetë mundësia e vetme që dy ikonat e futbollit të përplasen në skenën më të madhe të mundshme.
Edhe pse deri atëherë duhet të kalojnë disa pengesa të vështira, një finale mes Messit dhe Ronaldos do të ishte mbyllja perfekte e një rivaliteti që ka shënuar një epokë të tërë në historinë e futbollit.
