Në fillim të muajit qershor në disa media ishte publikuar një artikull promovues me “A po ndikon EuroKos Petrol drejtpërdrejt në uljen e çmimeve të derivateve në Kosovë?”, ku thuhej që edhe pse çmimi maksimal i lejuar nga Ministria e Tregtisë është 1.54 euro, litri i naftës në këtë pompë të derivateve po shitet me 1.45 euro, 9 cent më lirë se sa në kompanitë tjera.
Madje, Drejtori i EuroKos Petrol, Diellon Kelmendi, deklaronte se kjo kompani po ka ndikim të drejtpërdrejtë në uljen e çmimeve të derivateve në të gjithë Kosovën.
“Kur ne vendosim çmime më të ulëta, konkurrenca detyrohet të reagojë. Kjo krijon presion në treg dhe ndikon që edhe operatorët e tjerë të ulin çmimet. Në fund, fituesi më i madh është qytetari i Kosovës”, kishte deklaruar Diellon Kelmendi.
Mirëpo, prapa këtij çmimi të ulët duket se fshihej një skemë e rrezikshme, pasi që sot në kuadër të një mega-operacioni të zhvilluar nga Prokuroria Speciale, në bashkëpunim me Policinë e Kosovës, Doganën e Kosovës dhe Administratën Tatimore të Kosovës, është arrestuar pronari i Eurokos Petrol, Skender Kelmendi.
Ai është në mesin e nëntë personave të arrestuar, që dyshohen se funksiononin si grup i strukturuar kriminal, pasi që prokuroria thotë se janë të dyshuar për veprat penale të shpëlarjes së parave, kontrabandimit të mallrave në bashkëkryerje, pjesëmarrjes ose organizimit të grupit kriminal të organizuar, përdorimit të dokumenteve të rreme lidhur me tatimin dhe shmangies nga tatimi.
“Nga hetimet e deritanishme dyshohet se grupi kriminal ka përdorur dokumente të rreme tatimore dhe ka realizuar shitje e transaksione fiktive me derivate të naftës, me qëllim shmangien e detyrimeve tatimore dhe përfitimin e kundërligjshëm”, thuhet në njoftimin e prokurorisë për këtë rast.
Mediat për aksionin e sotëm kanë raportuar se ekzistojnë dyshime për një skemë kriminale, ku kompani importuese nga Shqipëria dyshohet se kanë importuar ujë në vend të derivateve të naftës, duke përdorur kompani fiktive dhe kompani aktive në Kosovë për të realizuar skemën dhe për të fshehur gjurmët e transaksioneve.
Çka u sekuestrua?
Gjatë kontrolleve të kryera në terren, hetuesit kanë sekuestruar një sasi të konsiderueshme të hollash, mjete transporti dhe armë:
15,000 euro para të gatshme;
5 vetura dhe 5 autobotë për transport të derivateve;
2 armë zjarri dhe 54 fishekë;
Pajisje elektronike dhe dokumente të ndryshme relevante;
301 euro në kartëmonedha 2-euroshe, të cilat dyshohet se janë të falsifikuara.
Të gjithë të dyshuarit, me vendim të prokurorit, pritet të dërgohen në mbajtje për procedime të mëtejshme gjyqësore.
Emat e të arrestuarve: Gazmend Quni, Skender Kelmendi, Faruk Mazrek, Naser Morina, Korab Visoka, Dashnim Miftari , Muhamet Mazrek, Fatmir Visoka, Adem Morina, Feriz Mazrek, Nysret Bajraktari
