Prokuroria Speciale javën e kaluar ka goditur një rrjet të madh të dyshuar për kontrabandë, shmangie tatimi dhe krim të organizuar. Nga ky aksion i madh janë arrestuar nëntë persona.
Sipas dosjes së siguruar nga Gazeta Insajderi thuhet se këta persona për vite me radhë, kanë kontrabanduar me naftë nga Shqipëria në Kosovë, duke iu shmangur kontrollit doganor.
Bazuar në dokumentin e Insajderit, goditje të fortë ka marrë edhe i pandehuri Dashnim Miftari dhe kompania e tij “Veda Petrol 2”.
Sipas urdhrit të përkohshëm të ndalimit të lëshuar nga Prokuroria Speciale (Departamenti për Hetimin e Krimit të Organizuar), bëhet e ditur se gjatë zbatimit të urdhërkontrollit, Miftarit dhe biznesit të tij në Hajvali u janë sekuestruar pasuri të lueshme dhe një sasi e jashtëzakonshme e dokumentacionit financiar:
Çfarë iu sekuestrua Dashnim Miftarit në banesën e tij në Prishtinë?
Gjatë bastisjes në banesën e tij në rrugën “Dom Nikoll Kaçrri” në Prishtinë, Policia ka sekuestruar: Një veturë luksoze të tipit BMW G5X X5 M50d me targa 01-390-EV, së bashku me çelësin e veturës dhe një telefon celular të tipit iPhone 16 Pro Max.
Çfarë u gjet dhe u sekuestrua në zyrat e “Veda Petrol 2” në Hajvali?
Në zyrat e biznesit të tij që gjenden në rrugën “Nekibe Kelmendi” në Hajvali (në objektin e zyrave të avokatëve), hetuesit kanë sekuestruar një rrjet të tërë të dokumenteve administrative dhe financiare që përfshijnë qindra fletë dërgesa e fatura:
Z-Raportet e shitjes dhe raportet e kasës për pika të ndryshme dhe periudha të gjata (kryesisht të vitit 2025).
Dokumente të importeve dhe blerjeve vendore të viteve të fundit.
Dokumentacion për pikat dhe objektet e kompanisë në mbarë Kosovën, duke përfshirë ato në Gjakovë, Sojevë, Budrikë, Pozhoran, Hodonoc, Llapashticë, Sodovinë, Mitrovicë, Bradash, Pejë, Obranqë, Kijevë, Gjilan, etj.
Marrëveshje zyrtare me Administratën Tatimore të Kosovës (ATK) dhe kontrata të punëtorëve.
Dosje për “Mall pa akcizë” të viteve 2023 dhe 2024.
Dokumente të tenderëve, ku veçohen dosjet e shënuara si “Tenderi HIB 2025” dhe “Tenderi HIB 2026”.
Libra të blerjes/shitjes, fatura nga sistemi EFIS, dokumente shpenzimesh për derivate e cigare, si dhe raporte të auditimit.
Ky urdhër ndalimi vjen në kuadër të çështjes penale me numër PPS Nr. 82/23, ku po zhvillohen hetime intensive ndaj një grupi të madh personash të dyshuar për vepra të rënda penale. Kompania “Veda Petrol” tashmë ndodhet nën llupën e fortë të Departamentit të Krimit të Organizuar të Prokurorisë Speciale
