Kylian Mbappe regjistroi një tjetër penallti të humbur në sfidën e Francës kundër Marokut, duke e çuar në 15 totalin e goditjeve të pasakta nga pika e bardhë gjatë karrierës së tij.
Rasti për t’i dhënë avantazhin Francës erdhi në minutën e 28-të, kur arbitri Facundo Tello akordoi penallti për “Gjelat”, vendim që u la në fuqi edhe pas kontrollit me VAR.
Gjithsesi, sulmuesi francez nuk ia doli të shënonte ndaj Bono. Mbappe synoi këndin e poshtëm të djathtë, por portieri i Marokut e parashikoi drejtimin dhe e priti goditjen.
Ndonëse vlerësohet si një nga sulmuesit më të rrezikshëm të futbollit modern, Mbappe ka tashmë 15 penallti të humbura në karrierë. Me këtë shifër, ai mban vendin e nëntë në renditjen e futbollistëve me më shumë penallti të dështuara që nga viti 2001.
Në vendin e parë të kësaj liste qëndron Cristiano Ronaldo me 36 penallti të humbura gjatë karrierës, ndërsa i dyti është Lionel Messi me 34. Neymar renditet më pas, pasi ka gabuar 22 herë nga 11 metra.
Më tej vijnë Ciro Immobile me 19 penallti të humbura, Francesco Totti me 18, Zlatan Ibrahimovic me 17, si edhe Ronaldinho dhe Edinson Cavani me nga 16. Antonio Di Natale dhe Sergio Aguero kanë dështuar nga 14 herë secili.
Sidoqoftë, ky numër i lartë lidhet edhe me faktin se këta futbollistë kanë marrë përsipër shpesh ekzekutimin e penalltive në çaste vendimtare.
Ronaldo, Messi, Neymar dhe Mbappe kanë realizuar dhjetëra gola nga pika e bardhë, por edhe emrat më të mëdhenj të futbollit nuk rezultojnë gjithmonë të saktë nga 11 metra.
