Një biznesmen me bazë në Miami, ndaj të cilit në Shqipëri rëndon një kërkesë për pastrim parash nga droga, dyshohet se ka manipuluar dokumentet e pronësisë së tokës ku Jared Kushner synon të ndërtojë një resort shumë miliardësh, sipas dosjeve të çështjes të shqyrtuara nga Reuters dhe të cituara nga agjencia shqiptare për luftën kundër krimit të organizuar.
Biznesmeni, Artur Shehu, i hedh poshtë të gjitha akuzat, tha avokati i tij Kujtim Cakrani, i cili konfirmoi se prokurorët shqiptarë kanë lëshuar një urdhër-arresti për ndalimin e Shehut me dyshimin e pastrimit të parave për grupet e drogës.
Sipas dosjeve, Shehu dhe njerëz të lidhur me të akuzohen për trafikun e kokainës nga Amerika e Jugut drejt porteve europiane dhe për pastrimin e fitimeve përmes investimeve në një perandori të pasurive të paluajtshme, ku përfshihen edhe dokumente të falsifikuara pronësie.
“Asgjë që është pretenduar për karakterin e z. Artur Shehu nuk qëndron. Ai nuk është as trafikant droge dhe as falsifikues i dokumenteve të pronës”, deklaroi Cakrani.
Ai shtoi: “Z. Shehu është në dijeni të akuzave të ngritura nga prokuroria shqiptare. Këto akuza nuk e shqetësojnë, sepse ai thotë se e vërteta është krejt tjetër nga ajo që pretendon prokuroria”.
Një përfaqësues i Departamentit të Drejtësisë të SHBA-së nuk pranoi të komentojë nëse kishte mbërritur ndonjë kërkesë nga Shqipëria për të gjetur apo ndaluar Shehun në Miami.
Në prill, Shehu i shiti rripin e paprekur bregdetar shqiptar Albania Land Development, kompani në pronësi të zhvilluesve të projektit të mbështetur nga Kushner, Sazan Real Estate Development, si edhe investitorëve të tjerë.
“Mbi bazën e provave lindin dyshime të arsyeshme se pasuritë në fjalë janë siguruar përmes përdorimit të dokumenteve të falsifikuara”, shkruajnë prokurorët në dosje.
Aty nuk ngrihet asnjë akuzë për shkelje ndaj dhëndrit të Presidentit të SHBA-së, Donald Trump, Jared Kushner, as ndaj Sazan Real Estate Development, Albania Land Development apo investitorëve të tjerë të përfshirë në projekt.
Reuters nuk gjeti asnjë tregues se ndonjë investitor kishte qenë në dijeni të ndonjë dyshimi për Shehun kur bleu tokën prej tij. Një zëdhënës i Sazan Real Estate Development nuk iu përgjigj akuzave ndaj Shehut kur Reuters kërkoi koment, por theksoi se kompania besonte që blerjet e tokës ishin të ligjshme.
Albania Land Development nuk iu përgjigj kërkesave për koment. Edhe zëdhënësi i Kushner refuzoi të komentonte për këtë çështje. Ndërkohë, Sazan ka konfirmuar se Kushner është investitor në projekt, por roli i saktë i tij dhe masa e investimit nuk janë bërë publike.
PROJEKTI NË TOKË SHTETËRORE NË QENDËR TË KUNDËRSHTIVE
Pretendimi se aktet mund të jenë falsifikuar i shton një tjetër problem projektit të profilit të lartë, i cili tashmë përballet me protesta të mëdha për shkak të akuzave se rrezikon faunën dhe florën.
Banorët e fshatit Zvërnec, pranë zonës së projektit, e kanë kundërshtuar pretendimin e Shehut për tokën përmes proceseve gjyqësore që datojnë prej më shumë se një dekade.
Muajin e kaluar, një grup prej një duzine banorësh i paraqiti Reuters aktet e pronësisë dhe dokumentet tatimore, që sipas tyre provojnë se ata janë pronarët e ligjshëm të tokës. Avokati i tyre, Kostandin Beko, deklaroi se çështja mbetet e hapur dhe se ata synojnë të kërkojnë një vendim gjykate për ta ndalur projektin e resortit.
Shqipëria, dikur ndër vendet më të varfra dhe më të izoluara të Europës, është sot kandidate për anëtarësim në BE dhe po përjeton një vrull ndërtimesh përgjatë disa prej vijave të fundit të paprekura bregdetare të kontinentit në Detin Adriatik. Resorti i mbështetur nga Kushner është parashikuar në një brez me plazhe të egra, pyje dhe një kënetë ku jetojnë breshkat e detit dhe flamingot. Pikërisht zogjtë janë kthyer në simbol të kundërshtarëve të projektit, të cilët protestat e tyre i kanë quajtur “Revolucioni i Flamingove”.
Bashkëshortja e Kushnerit, Ivanka Trump, ka thënë se ideja për resortin lindi për çiftin kur panë bregdetin nga një jaht vite më parë. Në vitin 2024, Kushner i bëri publike planet në rrjetet sociale me një vizatim artistik që shfaqte tokën të transformuar me hotel, vila, pishina dhe skela për jahte. Ai nuk ka bërë të ditur publikisht shumën e investuar. Qeveria shqiptare i ka mbështetur fuqishëm planet dhe pretendon se protestat janë organizuar nga kundërshtarët e saj politikë.
Kryeministri Edi Rama i tha Reuters muajin e kaluar se projekti ishte “i bukur” dhe do të vazhdonte pavarësisht kundërshtimeve. I pyetur për akuzat në dosjet ndaj Shehut, një zëdhënës i qeverisë tha se ekzekutivi nuk do të ndërhynte në transaksione private, por theksoi se projekti po ecën në përputhje me ligjet e Shqipërisë dhe të BE-së. Më herët, Brukseli i ka kërkuar Shqipërisë, si vend kandidat për në BE, të respektojë rregullat mjedisore të Bashkimit Europian lidhur me këtë projekt. Një zëdhënës i Komisionit Europian nuk dha komente shtesë.
PROKURORËT SHQIPTARË HEDHIN Dritë MBI ÇËSHTJEN
Dosjet ndaj Shehut janë përgatitur nga Struktura Speciale Kundër Korrupsionit dhe Krimit të Organizuar në Shqipëri, SPAK, e krijuar në vitin 2019 për të luftuar korrupsionin me hetues dhe prokurorë të pavarur nga policia dhe prokuroria e zakonshme. Materiali përbëhet nga 200 faqe dhe nuk është bërë publik. I pyetur për dosjet, një zëdhënës i agjencisë konfirmoi se SPAK po e heton çështjen, por nuk dha më shumë hollësi. Dokumentet mbajnë datën 12 qershor 2026. Po atë ditë, SPAK shpalli publikisht edhe urdhër-arreste për 20 persona për trafik narkotikësh dhe pastrim të parave të përfituara prej tij.
Ndryshe nga dosjet, ku Shehu dhe figura të tjera përmenden me emër, urdhër-arrestet i identifikojnë të dyshuarit vetëm me iniciale, sipas praktikës standarde në Shqipëri, ku emrat nuk bëhen publikë përpara akuzimit. Inicialet në urdhër-arreste përputhen me emrat e plotë të personave të përshkruar në dosje, përfshirë edhe një të dyshuar të identifikuar si “A.Sh.”. Avokati i Shehut, Cakrani, duke pranuar se Shehu ishte një objektiv, tha se nuk ishte i shqetësuar nga urdhër-arresti, pasi “besohej gjerësisht” se prokurorët shqiptarë vepronin nën ndikimin e politikanëve dhe figurave të biznesit.
SPAK nuk ka bërë të ditur nëse ndonjë prej 20 të dyshuarve është arrestuar apo akuzuar më pas.
SHQIPTARI QË JETON NË MIAMI
Sipas dokumenteve të SPAK, Shehu e shiti tokën për projektin e resortit për rreth 110 milionë euro, fonde që sipas tij u urdhërua të mbaheshin në llogarinë e një noteri, duke bërë që paratë të mos shkonin te Shehu. Në dosje thuhet se Shehu dhe bashkëpunëtorët “blenë tokë duke përdorur fonde të fituara në mënyrë të paligjshme dhe falsifikuan dokumente pronësie duke krijuar tituj të rremë pronësie ose duke rritur artificialisht sipërfaqen e pronave”.
“Pronat më pas u transferuan ose shkëmbyen në mënyrë që të mos gjurmoheshin lehtësisht nga autoritetet”. Një zëdhënës i Sazan Real Estate Development tha: “Ne vazhdojmë të besojmë se blerjet themelore të tokës janë kryer ligjërisht dhe në përputhje me procedurat në fuqi. Si gjithmonë, ne respektojmë dhe do të bashkëpunojmë me çdo proces të ligjshëm, sipas nevojës”.
Reuters kërkoi nga zëdhënësi sqarime pse kompania mendonte se blerjet e tokës ishin të ligjshme, duke marrë parasysh akuzat e prokurorëve kundër Shehut, por nuk mori përgjigje tjetër. Avokati i Shehut, Cakrani, i tha Reuters se familja e Shehut e kishte zotëruar tokën që nga koha e Perandorisë Osmane, më shumë se 100 vjet më parë, dhe se Shehu ua kishte shitur atë ligjërisht investitorëve të resortit. Cakrani e përshkroi Shehun si një qytetar të ndershëm që kërkoi azil politik në Shtetet e Bashkuara në vitin 1998 pasi “bandat kriminale” vranë vëllain dhe xhaxhain e tij para syve të tij. Reuters nuk arriti ta verifikonte në mënyrë të pavarur këtë pretendim.
